У новай cпартыўнай зале

Даволі доўгі час спартсмены і аматары здаровага ладу жыцця з СК “Мядзведзь” трэніраваліся ў не зусім утульнай і прыстасаванай для гэтага зале інтэрната камбіната панэльнага домабудавання. І вось, нарэшце, дзякуючы садзейнічанню райвыканкама і непасрэдна намесніка старшыні райвыканкама Сяргея Сарокава, спартыўнаму клубу аддадзена ў арэнду частка другога паверха сацыяльна-педагагічнага цэнтра з дзіцячым прытулкам, што знаходзіцца па вуліцы Мантажнікаў, 16 Б, у райцэнтры.

Раней гэтыя памяшканні не выкарыстоўваліся. Цяпер жа сіламі членаў клуба і за іх уласныя грошы там абуладкавана трэнажорная зала з разнастайным спартыўным інвентаром, а з дапамогай настаяцеля Свята-Ціханаўскага храма Пятра Піліпчука — прасторная зала для заняткаў змешанымі адзінаборствамі. Вельмі важна, што ў гэтым, па сутнасці, невялікім спартыўным комплексе ёсць усе ўмовы для паўнацэнных заняткаў спортам, а таксама санвузлы, месца для пераадзявання і зона адпачынку.

Як заўважае старшыня СК “Мядзведзь” Аляксандр Дулік, на базе выдзеленых памяшканняў таксама будзе арганізаваны спартыўна-патрыятычны цэнтр, што дазволіць яшчэ больш актывізаваць работу па патрыятычным выхаванні дзяцей і падлеткаў. “У нас займацца можа кожны жадаючы, прычым рознымі  відамі спорту, да таго ж  атрымаць практычныя веды па самаабароне, — расказвае Аляксандр. — Дастаткова толькі прыйсці да нас і ўступіць у наш клуб”.

Заняткі ў клубе пачнуцца з наступнага панядзелка, 7 кастрычніка, і будуць праходзіць штодзённа, акрамя выхадных, з 17.30 да 20.30. Па панядзелках, серадах і пятніцах будуць займацца мужчыны, па аўторках і чацвяргах — жанчыны, а па суботах і нядзелях плануецца праводзіць дадатковыя заняткі з дзецьмі.

Усе, хто жадае займацца ў трэнажорнай зале або цікавіцца разнастайнымі відамі адзінаборстваў, можа прыйсці ў спартыўную залу ў час яе работы ці папярэдне патэлефанаваць па нумары 8-029-823-04-52 (пасля 17 гадзін).

Уладзімір САКАЛОЎ.