Прагуляў — прыйдзецца адпрацаваць

Абавязаныя асобы, якія павінны кампенсаваць расходы за ўтрыманне дзяржавай іх дзяцей, знаходзяцца пад пастаянным кантролем. І на чарговым пасяджэнні Каардынацыйнага савета па рэалізацыі на тэрыторыі раёна Дэкрэта Прэзідэнта Рэспублікі Беларусь ад 24 лістапада 2006 года № 18 “Аб дадатковых мерах па дзяржаўнай абароне дзяцей у неспрыяльных сем’ях” разглядалася работа, якую праводзіць у гэтым накірунку раённы аддзел унутраных спраў.

Як адзначыў у сваім дакладзе начальнік РАУС Аляксей Яроменка, супрацоўнікамі праводзіцца мэтанакіраваная работа з усімі абавязанымі асобамі. Пры атрыманні інфармацыі аб няяўцы на работу праводзяцца мерапрыемствы па вышуку такіх асоб і дастаўцы іх на месца працы. Калі чалавек не жадае працаваць і спрабуе ўхіліцца ад выканання сваіх абавязкаў, то прымаюцца меры адміністрацыйнага ўздзеяння, а самых заўзятых прагульшчыкаў накіроўваюць у Крывошынскую псіханеўралагічную бальніцу. Калі і гэта не дапамагае, афармляюцца пуцёўкі ў лячэбна-працоўны прафілакторый.

Менавіта злоўжыванне спіртнымі напіткамі з’яўляецца асноўнай прычынай як адабрання дзяцей у такіх гора-бацькоў, так і здзяйснення імі, будучы ўжо абавязанымі асобамі, прагулаў.

Адным з пытанняў, якое ў чарговы раз узнімалася на пасяджэнні Каардынацыйнага савета, стала слабае ўзаемадзеянне некаторых прадпрыемстваў і арганізацый, у якіх працуюць абавязаныя асобы, з аддзеламі ўнутраных спраў і па працы і занятасці. Напрыклад, у СВК “Крышылавічы”, дзе налічваецца 6 абавязаных асоб, не наладжаны належны кантроль за такімі работнікамі, у выніку чаго імі здзяйсняюцца прагулы і да іх своечасова не прымаюцца належныя меры ўздзеяння. Больш таго, у кіраўніцтва сельгаскааператыва ўвогуле няма зацікаўленасці ў вырашэнні задач, акрэсленых Дэкрэтам № 18. Хаця менавіта на работадаўцаў ускладзены абавязкі арганізацыі работы абавязаных асоб і кантролю за выкананнем імі сваіх абавязкаў. У той жа час са станоўчага боку адзначаны СВК “Хатынічы”, “Бярозавец” і будаўнічая арганізацыя ПМК-14, дзе сочаць за абавязанымі асобамі, даюць ім магчымасць зарабіць і пры наяўнасці прагулаў прымаюць меры па іх адпрацоўцы.

У цэлым, за верасень па раёне абавязанымі асобамі здзейснены 153 прагулы, якія ў асноўным прыпадаюць на некалькіх чалавек. Частка з іх увогуле знаходзіцца ў вышуку. Як сведчаць лічбы, сёлета за 8 месяцаў працэнт пакрыцця расходаў дзяржавы на ўтрыманне дзяцей абавязанымі асобамі складае па раёне 49 працэнтаў, што на 6-7 працэнтаў вышэй, чым у аналагічным перыядзе мінулага года.

Павел СВІСТУНОВІЧ.