Бульбы многа не бывае…

Пачынаючы з верасня, па ўсёй Брэстчыне праходзяць восеньскія кірмашы па продажы сельскагаспадарчай прадукцыі. У нашым райцэнтры першы з іх адбыўся ў мінулую суботу каля гарадскога рынку і выклікаў сапраўдны ажыятаж у гараджан.

Сваю прадукцыю на кірмашы прадставілі сельгасарганізацыі раёна і райспажыўтаварыства, а таксама мясцовыя сялянска-фермерскія гаспадаркі і адна — з Клецкага раёна. З самага ранку каля машын ужо тоўпіўся народ. Асаблівым попытам карысталіся бульба і зерне, якія людзі закуплялі мяхамі. Сапраўды, такія кірмашы — цудоўная магчымасць нарыхтаваць сельгаспрадукцыю для сябе па прывабнай цане. Кошт той жа бульбы вагаўся ад 1500 да 2450 рублёў. І ўжо каля 10 гадзін раніцы прывезены на кірмаш “другі хлеб” быў амаль поўнасцю прададзены,  што нават прыйшлося давозіць бульбу некалькімі машынамі з СВК “Агарэвічы” і “Дубнякі”. У цэлым жа на кірмашы гараджане закупілі 20 тон бульбы.

Такі попыт на бульбу не выклікае здзіўлення — сёлета яна не ўрадзіла, і людзі выкарыстоўваюць магчымасць папоўніць свае запасы бульбай новага ўраджаю па нізкай цане. У будзённы дзень на гарадскім рынку цана за кілаграм бульбы вагаецца ад 3,5 да 4 тысяч рублёў за кілаграм.

Высокі кошт трымаюць прыватнікі і на іншую агародніну. Зусім нядаўна давялося пачуць скаргу жанчыны, якая гаравала аб тым, што на рынку купіла вялізную сетку капусты па 5 тысяч рублёў за кілаграм, а потым аказалася, што ў “Родным куце” яна, ды яшчэ лепшай якасці, прадаецца па 2400 рублёў. Ну, што тут скажаш: кожны вольны прадаваць па сваёй цане, як і спажыўцы выбіраць, дзе купіць. І менавіта такія восеньскія кірмашы дазваляюць нарыхтаваць агародніну і іншую сельскагаспадарчую прадукцыю па самай нізкай цане.

Добра разыходзілася на кірмашы і зерне (трыцікале, ячмень і пшаніца) — па цане ад 2000 да 2500 рублёў. Яго таксама прададзена нямала — 9 тон. Усё ж такі ў горадзе шмат людзей трымаюць на ўласных падворках хатнюю жыўнасць.

Дарэчы, уся агародніна карысталася папулярнасцю ў людзей: звыш 3,5 тоны прададзена капусты, прыкладна па 2 тоны — сталовых буракоў, морквы і цыбулі, кошт якіх вагаўся ад 2400 да 3500 рублёў за кілаграм. Вельмі парадавала коштам яблык СФГ “Аграсад — Кукава”, гаспадар якой прадаваў сваю прадукцыю па 4-5 тысяч рублёў за кілаграм. Для параўнання: на рынку яблыкі прадаюць   па 8,5 тысячы рублёў. Вабіла да сябе цаной, якасцю і разнастайнасцю прадукцыі таксама гандлёвая кропка СФГ “Агра-Восень”. Дарэчы, і шматлікія гандлёвыя кропкі райспажыўтаварыства не абміналі пакупнікі.

Агульны ж тавараабарот кірмашу, па даных аддзела эканомікі райвыканкама, склаў амаль 120 мільёнаў рублёў, прычым  больш за 90 мільёнаў рублёў гараджане якраз патрацілі на бульбу і іншую агародніну.

У бліжэйшы час запланавана правядзенне яшчэ аднаго такога кірмашу, на якім, з улікам попыту, будзе прадстаўлена яшчэ больш сельгаспрадукцыі. Аб тым, калі адбудзецца наступны восеньскі кірмаш, “СП” паведаміць загадзя.

Аляксей ГРУШЭВІЧ.

НА ЗДЫМКАХ: яблыкі СФГ “Аграсад — Кукава” разабралі за некалькі гадзін; чарга за бульбай, якую прывезлі на кірмаш з СВК “Будча”.

Фота аўтара.