Паліва па льготнай цане

У рэдакцыю патэлефанаваў жыхар вёскі Чудзін Мікалай Антонавіч Барсукевіч і папрасіў разабрацца, чаму ў мясцовым лясніцтве яму даюць па льготнай цане толькі 2 кубаметры дроў, а яму трэба 8?

 Каб высветліць сітуацыю, рэдакцыя “СП” звязалася з кіраўніком Чудзінскага лясніцтва Анатоліем Рулінскім. Ён патлумачыў, што Мікалай Антонавіч Барсукевіч адносіцца да льготнай катэгорыі грамадзян, прыраўнаванай да ўдзельнікаў Вялікай Айчыннай вайны. А значыць, пры набыцці паліва для ацяплення свайго жылля ён мае права на пэўныя льготы. У мясцовым лясніцтве, як патлумачыў Анатолій Рулінскі, згодна з рашэннем Брэсцкага аблвыканкама № 481 ад 22.06.2012 года кожнай сям’і, якая пражывае ў населеных пунктах сельсавета, выдзяляецца адзін раз у год па бюджэтнай цане 7 складаметраў, ці 4,6 кубічнага метра дроў. У гаспадароў сядзіб маецца так званая паліўная кніжка, у якой і фіксуецца набыццё паліва. Па сваім жаданні адны выпісваюць яго ў лясніцтве (дрывамі), другія — у райпалівазбыце (брыкетам), але ўмовы выпіскі паліва захоўваюцца ў абедзвюх арганізацыях.

Паколькі сям’я М. А. Барсукевіча сёлета ўжо скарыстала сваё права на льготнае набыццё паліва ў райпалівазбыце (1.08.2013 года гаспадару выпісана 3 тоны брыкету па льготнай цане), што і адзначана ў паліўнай кніжцы,  то ў лясніцтве Барсукевічы  ўжо не могуць выпісаць дроў па льготнай цане.

Дарэчы, ляснічы Чудзінскага лясніцтва А. А. Рулінскі назваў і кошт аднаго кубічнага метра дроў, які залежыць ад пароды дрэў. Так, 1 кубаметр сасны, вольхі каштуе 34, 5 тысячы рублёў, асіны, таполі, елкі — 25,5 тысячы, дуба, ясеня, граба, бярозы — 36,5 тысячы рублёў.

Пытанне высвятляла Марыя Дзёміна.