На “Вертыкалі” прайграўшых няма

У мінулую суботу ў спартыўнай зале СШ № 1 было шматлюдна. Тут на адкрыцці раённай спартакіяды “Вертыкаль” сабраліся работнікі выканаўчых і распарадчых органаў, кіраўнікі, намеснікі кіраўнікоў, спецыялісты арганізацый, прадпрыемстваў, устаноў Ганцаўшчыны, прыхільнікі спорту і здаровага ладу жыцця.

Асноўная частка спартакіяды праходзіла ў СШ № 1 і гімназіі, дзе адбыліся спаборніцтвы па міні-футболе, дартсе, шашках, шахматах і настольным тэнісе. Перамогу ў футбольным турніры святкавалі прадстаўнікі райаддзела ўнутраных спраў. Лепшымі сярод шахматыстаў сталі: Дзмітрый Сайка (КПД) і Людміла Дубоўская (зборная каманда сельвыканкамаў). Мікалай Новік (зборная каманда ПМК-7 і ПМК № 14) і Лідзія Ленкавец (лясгас) перамаглі ў турніры па шашках. У спаборніцтвах па дартсе лепшымі былі Віктар Дрозд (райвыканкам) і Лілія Шышко (райспажыўтаварыства). Нарэшце, пераможцамі ў спаборніцтвах па настольным тэнісе сталі Аляксандр Бароўскі (зборная каманда ПМК-7 і ПМК № 14) і Вольга Мелехавец (РАУС).

Валейбалісты спаборнічалі ў спартыўнай зале па вуліцы Мантажнікаў. Тут перамогу заваявалі спартсмены з лясгаса.

Нарэшце, у веласіпеднай эстафеце, маршрут якой быў наступным: гарадская плошча — хлебазавод — раённы метадычны цэнтр — магазін “Родны кут”, мацнейшай стала зборная каманда ПМК-7 і ПМК № 14.

Пасля заканчэння спаборніцтваў для ўдзельнікаў спартакіяды ў гарадскім Доме культуры прайшоў святочны канцэрт. У ГДК адбылася і цырымонія ўзнагароджвання. Пераможцы і прызёры асобных відаў атрымалі ўзнагароды і падарункі з рук галоўнага суддзі спаборніцтваў Яўгена Кабрынца.

Аднак шматлікіх прысутных вельмі цікавіла пытанне: якая каманда стала лепшай у агульным заліку? Па выніках усіх відаў спаборніцтваў перамогу заваявала каманда раённага аддзела ўнутраных спраў. Другое месца занялі спартсмены з лясгаса. Трэцяй стала каманда райвыканкама. Каманды-прызёры агульнага заліку атрымалі ўзнагароды і падарункі з рук кіраўніка раёна Аляксандра Саланевіча.

Прыемна адзначыць, што спартакіяда сабрала вялікую колькасць удзельнікаў. Сяброўская атмасфера, усмешкі, жарты і станоўчыя эмоцыі на тварах усіх спартсменаў сведчылі толькі аб адным — на “Вертыкалі” прайграўшых не было.

Уладзімір САКАЛОЎ.

НА ЗДЫМКУ: падчас веласіпеднай эстафеты.

Фота аўтара.