КАБ БЫЛА СПАКОЙНАЙ СТАРАСЦЬ

Існуе меркаванне, што адносіны грамадства да пажылых людзей сведчаць аб агульнай выхаванасці чалавека і ўсёй нацыі. На Ганцаўшчыне, як і ва ўсёй краіне, да састарэлых людзей адносяцца з вялікім клопатам,  аказваюць ім неабходную дапамогу. І Ганцавіцкі тэрытарыяльны цэнтр сацыяльнага абслугоўвання насельніцтва з’яўляецца адной з устаноў, якія ажыццяўляюць такую дзейнасць. Менавіта аб рабоце з пажылымі людзьмі карэспандэнту “СП” Уладзіміру САКАЛОВУ расказала дырэктар цэнтра Наталля ЗЯЛЁНКА:

— Уся работа з пажылымі людзьмі заснавана на аб’яднанні сумесных намаганняў органаў дзяржаўнай улады, упраўлення па працы, занятасці і сацыяльнай абароне райвыканкама, прадпрыемстваў, арганізацый, устаноў, грамадскіх аб’яднанняў раёна і накіравана на аказанне неабходнай дапамогі пажылым людзям.

На Ганцаўшчыне па стану на 1 верасня пражывала 9005 пенсіянераў і інвалідаў, з якіх 3088 мужчын і 5917 жанчын, пажылых людзей — 6618. Грамадзян ад 70 да 79 гадоў у раёне налічвалася 2117 чалавек, ад 80 да 89 — 1072, ад 90 да 99 — 83 чалавекі. На жаль, людзей, якія перасягнулі мяжу ў 100 гадоў, у нашым раёне не засталося…

Сярод пажылых людзей — 589 адзінокіх грамадзян. Яшчэ 4329 чалавек з катэгорыі пажылых з’яўляюцца адзінока пражываючымі. 390 пенсіянераў жывуць разам з працаздольнымі сваякамі.

Асаблівая ўвага ўдзяляецца намі ветэранам Вялікай Айчыннай вайны і асобам, што пацярпелі ад яе наступстваў. Такіх у нашым раёне пражывае 82 чалавекі.

Сёлета на Ганцаўшчыне прайшоў шэраг мерапрыемстваў для пажылых людзей. У пачатку студзеня мы ўшанавалі тых, хто прысвяціў сваё жыццё працы ў органах сацыяльнай абароны. У Дзень абаронцаў Айчыны памятныя падарункі ад рабят з аддзялення дзённага наведвання для маладых людзей з абмежаванымі магчымасцямі, што дзейнічае пры нашым цэнтры, атрымалі інваліды, удзельнікі Вялікай Айчыннай вайны, якія знаходзяцца на надомным абслугоўванні. У красавіку ў райвыканкаме прайшла сустрэча, прысвечаная Міжнароднаму дню вызвалення вязняў фашысцкіх канцлагераў. Напярэдадні Вялікадня супрацоўнікі тэрытарыяльнага цэнтра пабывалі ў Дзяніскавіцкай бальніцы сястрынскага догляду, дзе павіншавалі са святам яе наведвальнікаў і падарылі ім святочныя падарункі. Маштабныя мерапрыемствы для пажылых людзей прайшлі і на галоўныя дзяржаўныя святы: Дзень Перамогі і Дзень Незалежнасці. А ў Дзень вызвалення Ганцавіч, 8 ліпеня, у кінатэатры “Маладосць” адбылася цудоўная сустрэча ветэранаў Вялікай Айчыннай вайны з кіраўніцтвам раёна, ініцыятарам якой выступіла ветэран ВАВ Вольга Іванаўна Задзяркоўская.

Прыемным стала і віншаванне з юбілеямі пажылых грамадзян, што знаходзяцца на надомным абслугоўванні ў аддзяленні сацыяльнай дапамогі. Разам з цёплымі віншавальнымі словамі падчас гэтых сустрэч ім падораны сувеніры і падарункі.

Канешне ж, нельга сказаць, што ўся гэта работа праводзіцца выключна работнікамі цэнтра. Вялікую дапамогу нам аказваюць райвыканкам, раённы савет ветэранаў і асабіста яго старшыня Яўгенія Сяргееўна Стацько, раённая арганізацыя Беларускага Таварыства Чырвонага Крыжа, РК ГА БРСМ і іншыя грамадскія аб’яднанні, а таксама райаддзелы па надзвычайных сітуацыях і ўнутраных спраў. Словы ўдзячнасці хочацца выказаць і некаторым індывідуальным прадпрымальнікам, якія па магчымасці аказваюць нам значную падтрымку. Часцей за ўсё яны не жадаюць, каб іх прозвішчы сталі вядомымі ўсёй грамадскасці, аднак іх дапамога пажылым людзям — неацэнная.

Напярэдадні Дня пажылых людзей у раёне таксама запланаваны шэраг урачыстых мерапрыемстваў. Напрыклад, учора адно з іх, пад назвай “З клопатам аб людзях”, прайшло ў Хатынічах. А галоўнае святочнае мерапрыемства з нагоды Дня пажылых людзей “Людзі, лёсы, час” адбудзецца 1 кастрычніка ў гарадскім Доме культуры.

НА ЗДЫМКУ: падчас аднаго з мерапрыемстваў для пажылых людзей у Дзяніскавіцкай бальніцы сястрынскага догляду.

Фота Уладзіміра САКАЛОВА.