Футбалісты райспажыўтаварыства — чэмпіёны раёна!

Цікавую развязку падарыў гледачам адкрыты чэмпіянат раёна па футболе.  У нядзелю прайшла гульня, якую шматлікія прыхільнікі футбола чакалі з самага пачатку турніру: сустрэліся лепшыя каманды раёна — “Райспажыўтаварыства” і “Будаўнік — ПМК-14”.

Аднак спачатку аб сустрэчы, якая таксама значна паўплывала на размеркаванне месцаў у турнірнай табліцы. У суботу ў Хатынічах  сустракаліся каманды СВК “Хатынічы” і “Малькавічы”. Шматлікія аматары футбола сабраліся ў гэты дзень на трыбунах школьнага стадыёна, каб падтрымаць мясцовых футбалістаў. Сярод тых, хто жадаў перамогі гаспадарам, былі і спартсмены з райспажыўтаварыства. І гэта невыпадкова:  калі б перамаглі госці, то райспажыўтаварыству ў гульні супраць “Будаўніка — ПМК-14” патрэбна была перамога з розніцай у тры ці больш галоў.  Калі б сустрэча завяршылася ўнічыю ці перамаглі гаспадары, то футбалістам райспажыўтаварыства спатрэбілася б перамога з любым лікам. 

І хатыніцкія футбалісты падарылі сваім прыхільнікам сапраўднае свята. Гаспадары саступалі па ходу гульні з лікам 0:2, аднак апошнюю дзесяціхвілінку правялі проста выдатна і не толькі выраўнялі лік, але і “вырвалі” перамогу — 3:2.

Вынік гульні ў Хатынічах рабіў сустрэчу фаварытаў яшчэ больш цікавай і, па сутнасці, фінальнай: хто перамагае, той становіцца чэмпіёнам (футбалістам з будаўнічай арганізацыі было дастаткова згуляць і ўнічыю). З першых хвілін гульні футбалісты райспажыўтаварыства валодалі перавагай. У першым тайме толькі Сяргей Савеня  тройчы (!) трапляў у каркас варот.  Перавага намінальных гасцей (каманды райспажыўтаварыства) неўзабаве вылілася ў забіты гол. Абаронца “Будаўніка — ПМК-14” падштурхнуў у спіну Сяргею Савені, і галоўны суддзя назначыў пенальці, які ўпэўнена рэалізаваў Аляксей Сукач.  Пасля гола “будаўнікі” перахапілі ініцыятыву і, дзякуючы стандартным становішчам у выкананні Івана Вадап’яна, мелі некалькі момантаў для таго, каб выраўняць лік. Аднак  абаронцы і галкіпер гасцей Сяргей Рабцэвіч дзейнічалі беспамылкова.

А вось у другім тайме перавага “Райспажыўтаварыства” была відавочнай. Каманда галоўнага трэнера Андрэя Жалезнага, які ў другой палове таксама выйшаў на поле, не пакінула сваім сапернікам ніводнага шансу. Госці вызначыліся яшчэ тройчы, хаця маглі забіваць і больш. 

Такім чынам, фінальны свісток арбітра зафіксаваў перамогу каманды райспажыўтаварыства з лікам 4:0. Лепшым футбалістам сустрэчы прызнаны Аляксей Сукач, на рахунку якога тры забітыя галы.

Пасля сустрэчы прайшла цырымонія ўзнагароджвання. Пераможцам і сярэбраным прызёрам былі ўручаны медалі і ганаровыя кубкі. Назвалі і лепшых ігракоў турніру.  Так, лепшым галкіперам прызнаны Сяргей Гайкоў (“Малькавічы”), абаронцам — Юрый Мелехавец (райспажыўтаварыства), паўабаронцам — Уладзімір Сакалоў (райспажыўтаварыства), нападаючым — Іван Вадап’ян (“Будаўнік — ПМК-14”). Нападаючы “Будаўніка — ПМК-14” Аляксандр Дайлід стаў лепшым бамбардзірам турніру, а Вадзім Пабудзей з гэтай жа каманды, па меркаванні аматараў футбола, — лепшым іграком першынства. Спецыяльным прызам за адданасць футболу ўзнагароджаны Уладзімір Студэнт (“Будаўнік — ПМК-14”).

НА ЗДЫМКУ: намеснік старшыні райвыканкама Сяргей Сарокаў уручыў кубак пераможцы капітану каманды “Райспажыўтаварыства” Сяргею Рабцэвічу.

Фота Віталія Герасімені.