Салодкая работа

— У нас сёлета 80 пчаласем’яў. Размешчаны яны ў двух месцах: 20 — на тэрыторыі лясгаса і 60 — вось тут, недалёка ад Любашаўскага вадасховішча, — расказвае пчалавод. — На пачатку лета лясніцтва набыло 20 пчолапакетаў элітных сем’яў пчол, а таксама 30 паўнацэнных сем’яў. Пчол набылі пазнавата, затое цяпер у нас 25 працэнтаў матак элітных сартоў.

Таксама набылі платформы для вандроўкі пчол. Гэта дасць магчымасць у далейшым падвозіць вуллі для медазбору непасрэдна ў лясгас.

Як сказаў Міхаіл Аляксандравіч, пакуль цяжка прагназаваць, якую колькасць мёду ўдасца адкачаць. Адкачка, у залежнасці ад надвор’я, будзе весціся каля двух тыдняў.

Дапамагаюць пчалаводу работнікі лясгаса. У дзень нашага наведвання памочнікамі былі сакратар прыёмнай лясгаса Наталля Аляксандраўна Карасёва, інжынер па ахове працы Алена Анатольеўна Каляшук, вадзіцель Віктар Аляксандравіч Даўгаполаў, а таксама памочнік пчалавода Леанід Міхайлавіч Гуліцкі.

Сам жа Міхаіл Аляксандравіч пчалаводствам займаецца даўно, дзесьці трыццаць гадоў. Мае ён і  ўласныя вуллі.

— Ёсць дзеці, унукі — мёд патрэбны, — усміхаецца пчалавод. — Ды і прывык я ўжо з пчоламі працаваць, хоць клопату яны патрабуюць вельмі многа.

Міхаіл Аляксандравіч кажа, што пчолы, як і людзі, адрозніваюцца па характары. Некаторыя спакойныя, лагодныя, ніколі не ўкусяць. А іншыя, хоць і не чапаеш іх, толькі заўважаць цябе, ужо прагнуць укусіць.

— Затое такія, злыя, і мёду больш прыносяць, — смяецца пчалавод.

Салодкія кроплі ў сотах  блішчаць  на сонцы. Шчыруюць медазборцы, імкнуцца  зрабіць сёння як мага больш работы. Нездарма  ж  кажуць, што Мядовы Спас мёду прыпас. На ўсю зіму хопіць!

НА ЗДЫМКУ: у час медазбору.

Тэкст і фота

Яніны Ткачук.