Хто стане чэмпіёнам? 11 жніўня прайшлі сустрэчы кубка і чэмпіянату раёна па футболе.

У Ганцавічах у паядынку 1/4 фінала кубка каманда райспажыўтаварыства разграміла сапернікаў з “Дынама-2013” з лікам 12:0. Найбольшы ўклад у перамогу ўнеслі нападаючыя Дзмітрый Крыцкалюк і Сяргей Савеня. Першы запісаў на свой рахунак 6 галоў, другі — 4.

У Азярэччы, таксама ў чвэрцьфінальным паядынку, сустракаліся мясцовыя футбалісты і каманда СВК “Хатынічы”. Гульня атрымалася па-сапраўднаму кубкавай. З першых хвілін хатынаўцы завалодалі ініцыятывай. Яны хутка адкрылі лік і ў далейшым мелі некалькі выдатных момантаў, каб стаць лідарамі яшчэ ў першай палове. Аднак кульмінацыя наступіла на апошніх хвілінах сустрэчы. Гаспадары адыграліся на 82-й хвіліне, а яшчэ праз некалькі абаротаў секунднай стрэлкі вырваліся наперад. Але каманда з Хатыніч усё ж такі здолела выраўняць лік на апошняй хвіліне сустрэчы.

На жаль, на працягу дадатковай паўгадзіны гасцям не удалося выйсці наперад. Футбалісты “Азярэчча” забілі два мячы ў вароты гасцей і перамаглі з лікам 4:2.

Таксама ў нядзелю прайшла перанесеная сустрэча 7-га тура чэмпіянату раёна паміж камандамі “Будаўнік — ПМК-14” і “Малькавічы”. У гэтай гульні загадзя мог вызначыцца пераможца турніру. Калі б футбалісты з Малькавіч перамаглі, то сталі б недасягальнымі для сваіх сапернікаў. Аднак паядынак завяршыўся перамогай каманды з будаўнічай арганізацыі, таму ўсё вырашыцца толькі ў апошнім туры.

У матчы фаварытаў перавагай валодалі ганцаўчане. Яны хутка забілі 2 галы і кантралявалі ход гульні на працягу большай паловы сустрэчы. Пераломным момантам стала выдаленне аднаго з ігракоў “Будаўніка — ПМК-14” Яўгена Рабцэвіча (ён, дарэчы, прапусціць вельмі важны паядынак апошняга тура супраць райспажыўтаварыства). Пасля выдалення, пры ліку 3:2 на карысць ганцаўчан, малькаўцы поўнасцю перахапілі ініцыятыву. Госці мелі шэраг выдатных момантаў, каб выраўняць лік і выйсці наперад. Аднак на апошняй хвіліне яны прапусцілі контратаку, і Іван Вадап’ян, скарыстаўшыся памылкай галкіпера, адправіў чацвёрты мяч у вароты каманды з Малькавіч. Такім чынам, нялёгкая перамога футбалістаў “Будаўніка — ПМК-14” з лікам 4:2.

У апошнім туры аматараў футбола чакае па-сапраўднаму відовішчны паядынак. Дзве мацнейшыя гарадскія каманды — “Райспажыўтаварыства” і “Будаўнік — ПМК-14” — пазмагаюцца за званне чэмпіёна. Футбалістам райспажыўтаварыства патрэбна перамога з розніцай у 3 мячы. У іншым выпадку чэмпіёнам стане каманда з будаўнічай арганізацыі.

Сустрэча паміж камандамі “Райспажыўтаварыства” і “Будаўнік — ПМК-14” пройдзе ў нядзелю на стадыёне СДЮШАР у 18.30.

Завітала “Хваля”

У суботу, 10 жніўня, на стадыёне СДЮШАР прайшоў таварыскі матч па футболе паміж ФК “Ганцавічы” і ФК “Хваля” (г. Пінск).

Адзначым, што пінчане, якія знаходзяцца на чацвёртым месцы ў турнірнай табліцы першай лігі першынства Беларусі, прывезлі ў Ганцавічы амаль усіх сваіх мацнейшых футбалістаў. У складзе нашай каманды, наадварот, адсутнічалі многія лідары, а галоўны трэнер ганцаўчан Ігар Кунаш вырашыў праверыць у справе некалькі маладых ігракоў.

З першых хвілін гульні стала відавочна, што нашай камандзе будзе вельмі цяжка супрацьстаяць больш моцным сапернікам. Аднак, на радасць шматлікім балельшчыкам, якія ў гэты дзень прыйшлі падтрымаць ФК “Ганцавічы”, менавіта гаспадары адкрылі лік ужо на 7 хвіліне.

У далейшым пінчане валодалі значнай перавагай і ўжо да 25-й хвіліны змаглі не толькі адыграцца, але і выйсці наперад. Да канца першай паловы гульні госці маглі яшчэ некалькі разоў адправіць мяч у сетку варот ганцаўчан, аднак ім гэта не ўдалося: бліскуча гуляў наш галкіпер Дзмітрый Тарасевіч.

У другой палове сустрэчы госці значна аднавілі склад і выпусцілі на поле некалькі маладых футбалістаў. “Хваля” працягвала кантраляваць ход гульні, аднак і ганцаўчане праводзілі небяспечная атакі. У адной з іх, пасля ўдару Яўгена Рабцэвіча, мяч трапіў у штангу варот гасцей.

Такім чынам, фінальны свісток арбітра зафіксаваў перамогу футбалістаў “Хвалі” з лікам 2:1. Аднак, нягледзячы на паражэнне, ганцаўчане выглядалі дастойна.

Уладзімір САКАЛОЎ.