БЕРЕГИТЕ ВЕЛОСИПЕДЫ!

Штогод найбольшая колькасць крадзяжоў у раёне прыпадае на веласіпеды. Сёлета ўжо 10 гэтых транспартных сродкаў знаходзіцца ў вышуку. Асаблівасць жа ў тым, што знайсці ўкрадзены веласіпед даволі складана, і вяртаюцца яны да гаспадароў у адзінкавых выпадках.

Як адзначае начальнік раённага аддзела ўнутраных спраў Аляксей Яроменка, пераважная большасць крадзяжоў веласіпедаў адбываецца з-за бестурботнасці іх гаспадароў, якія пакідаюць сваю маёмасць без нагляду і пры гэтым не выкарыстоўваюць нават элементарныя ахоўныя прыстасаванні. А ўкрадзеныя веласіпеды цяжка знайсці па той прычыне, што іх гаспадары часта не маюць дакументаў на транспартны сродак і не ведаюць яго нумара, які выбіты на раме, а іншы раз увогуле не могуць назваць яго прыкмет — у лепшым выпадку памятаюць толькі колер рамы, якая лёгка перафарбоўваецца.

Таму, як раіць начальнік РАУС, варта добра ведаць, як выглядае ваша маёмасць, і, безумоўна, выкарыстоўваць ахоўныя прыстасаванні, якіх існуе вялікае мноства — ад спецыяльных маркераў, меткі ад якіх бачны толькі пры ўльтрафіялетавым святле, — да гукавой сігналізацыі, падобнай да аўтамабільнай. На жаль, на сённяшні дзень у гандлёвай сетцы раёна можна знайсці толькі звычайныя тросікі з замкамі, якія не могуць гарантаваць захаванасці веласіпедаў — даволі каштоўнага і неабходнага для жыхароў раёна транспарту, кошт якога можа вагацца ад 1,5 да 5 мільёнаў рублёў.

У цэлым жа ў раёне не праходзіць і тыдня, каб у міліцыю не паступілі паведамленні аб прапажы веласіпедаў. Прычым часта заяўнікі пасля гэтага самі іх і знаходзяць. Як потым высвятляецца, кінуць веласіпед ля дома, а хто-небудзь са сваякоў возьме праехацца. І не паспеюць разабрацца ў сітуацыі, як пачынаюць тэлефанаваць у міліцыю. Хапае і выпадкаў, калі чалавек добра “закладзе за каўнер” і потым не памятае, куды знік веласіпед. Ёсць і лжывыя паведамленні. Так, нядаўна жыхар вёскі Малькавічы паведаміў аб крадзяжы веласіпеда, які ён у п’яным стане быццам бы пакінуў у суседзяў. За лжывае паведамленне ён быў прыцягнуты да адміністрацыйнай адказнасці ў выглядзе штрафу, памер якога складае ад 400 да 800 тысяч рублёў.

Цікавы той факт, што ў раённым аддзеле ўнутраных спраў захоўваюцца знойдзеныя веласіпеды, пакуль незапатрабаваныя гаспадарамі. На сённяшні дзень такіх налічваецца 14 адзінак, з якіх 12 у хуткім часе будуць прададзены праз суд, а грашовыя сродкі пойдуць у даход дзяржавы.

Аляксей ГРУШЭВІЧ.