Дырэктар Лёзненскага раённага арганізацыйна-метадычнага цэнтра Г. Ф. Макравусава адна з 35 пераможцаў рэспубліканскага конкурсу «Жанчына года-2014»

Дырэктар раённага арганізацыйна-метадычнага цэнтра Г. Ф. Макравусава – адна з 35 пераможцаў рэспубліканскага конкурсу «Жанчына года-2014», які прайшоў у Мінску 14 сакавіка.

«Колькі сябе памятаю, музыка грала ў нашым доме. Усё маё дзяцінства прайшло пад гукі гармоніка таты і бубна, у які, як сапраўдны майстар, біла матуля. Ніводная вясковая складчына, радзіны, вяселле, хрысціны, провады ў войска не праходзілі без маіх бацькоў, Фёдара і Алены Бурых. Як добрых музыкантаў іх ведалі не толькі ў Сялян-Клёўцы і ў блізкіх вёсках, але і амаль ва ўсім Бялыніцкім раёне, што на Магілёўшчыне. Я, як меншая з дзяцей, заўсёды і ўсюды была з бацькамі і, наглядаючы за іх майстэрствам, вучылася таньчыць, на гармоніку іграць, песні спяваць…

Вось ужо амаль 30 гадоў я на сцэне, нясу традыцыі беларусаў і нашага роду людзям. Я ўдзячна Богу, што маё жыццё склалася так, а не інакш, што па ім поруч са мной крочыць песня матулі. Мне ўдалося акунуцца ў бяздоннае багацце, якое зараз мы называем нематэрыяльнай каштоўнасцю і карыстаемся ім у сваёй творчасці”.

Гэта ўсяго толькі малая частка таго, што расказала пра свой жыццёвы і прафесійны шлях Ганна Фёдараўна ў эсэ, напісанне якога было адной з умоў конкурсу. Гэты невялікі літаратурны твор, а таксама характарыстыка кандыдаткі, насычаная шматлікімі падзеямі, ўзнагародамі і рэалізаванымі праектамі, дапамаглі нашай зямлячцы перамагчы ў намінацыі «За ўклад у духоўна-маральнае адраджэнне нацыі».

Разам з Г. Ф. Макравусавай у фінал выйшлі 35 жанчын. Гэта педагогі, урачы, шматдзетныя маці, жыхаркі вёсак, кіраўнікі, работнікі культуры. Яны былі ўзнагароджаны яшчэ ў 3 намінацыях: «За лідэрства і паспяховае кіраўніцтва», «За дасягненні ў выхаванні дзяцей» «За ўклад у адраджэнне вёскі». Віцебскі рэгіён прадстаўлялі 3 жанчыны.

Людміла БІРУЛЬКОВА.