У Друі адбыліся афіцыйныя святкаванні 625-годдзя паселішча

Друя. Фота Radzima.org

У Друі адбыліся афіцыйныя святкаванні 625-годдзя паселішча. Самыя раннія звесткі пра Друю - з 1386 года - занатаваў Мацей Стрыйкоўскі ў сваёй "Хроніцы", напісанай у 16 стагоддзі.

У Вялікім княстве Літоўскім Друя была магдэбургскім горадам, важным эканамічным, рэлігійным і культурным цэнтрам. У Друі дзейнічаў кляштар францысканаў, заснаваны Сапегамі, былі праваслаўныя і грэка-каталіцкія святыні, вялікая габрэйская супольнасць. Гараджане актыўна ўдзельнічалі ў гандлі з Рыгай. "Друйскі лён" быў вядомы ў многіх краінах Еўропы.

З часоў царскай Расіі пачалася дэградацыя Друі. Савецкая ўлада "панізіла" Друю да статуса пасёлка гарадскога тыпу, а пры Лукашэнку Друя набыла статус сельскага паселішча.

Як піша раённая газета "Браслаўская звязда", урачыстасці пачаліся ў будынку сельвыканкама, дзе ганаровых гасцей, якія прыехалі на свята, віталі намеснік старшыні райвыканкама Іна Лысенка і в.а. старшыні сельвыканкама Ларыса Корсак. Сярод за-прошаных былі прадстаўнікі Полацкага пагранатрада, былыя кіраўнікі мясцовай улады, знакамітыя выхадцы з Друі. Завітаў на свята і друянін доктар тэхнічных навук Эдуард Краўчонак, які да нядаўняга часу працаваў у цэнтральным НДІ спецмашбудавання. Дарэчы, яго дзед у свой час быў мэрам Друі. Як сказаў пры размове Э. Краўчонак, на малую радзіму ён прыязджае двойчы ў год, тут ён зараджаецца бадзёрасцю.

Афіцыйныя святкаванні 625-годдзя Друі. Фота Аляксандра Азевіча, "Браслаўская звязда"

Для гасцей былі наладжаны экскурсіі ў бальніцу сястрынскага догляду і сярэднюю школу.

Тым часам жыхары пасёлка сабраліся на цэнтральнай плошчы, дзе нядаўна набыў сваю прапіску знакаміты Барысаў камень.

Пад гукі духавога аркестра адбылася невялікая ўрачыстасць па адкрыцці гэтага помніка даўніны, кіраўнікі раёна і прадстаўнікі грамадскасці ўсклалі да каменя кветкі.

Ля Дома культуры можна было згуляць у бяспройгрышную сельскагаспадарчую латарэю, пачаставацца прысмакамі ў павільёнах райпа, для дзяцей працавала гульнявая пляцоўка.

Пазней усіх прысутных запрасілі ў глядзельную залу ДК, дзе і адбылося асноўнае дзейства. Вядучыя расказвалі пра багатую гісторыю пасёлка, яго знакамітых людзей, гераічныя і трагічныя старонкі жыцця.

Усіх прысутных са святам павіншавалі старшыня райвыканкама Пётр Гішкелюк і дырэктар мясцовай гаспадаркі Аляксандр Бялюн.

Шмат цёплых слоў у адрас землякоў прагучала і з вуснаў вядучых.

Чытай таксама: 625 год гісторыі Друі