У краязнаўчым музеі ў Браславе пачала працаваць выстава пра старасвецкую Друю

Друя ў 1920-30-х гг. Фота: Nacyjonalny Archiwum Cyfrowy, nac.gov.pl

У выставачнай зале гістарычна-краязнаўчага музея Браслава пачала працаваць выстава “Друя – магдэбургскае месца”.

Друя - старажытны горад, які ўваходзіў у склад Полацкага княства і быў размешчаны на буйным гандлёвым шляху. Першы ўспамін аб ім адносіцца да 1386 года. Да канца XVI ст. Друя належыла роду Масальскіх, а у 1600 г. Леў Сапега набывае Друю і становіцца яе ўладальнікам. У 1620 г. Друя атрымала прывілей на Магдэбургскае права і герб: віціна на хвалях з разгорнутым ветразем.

Зараз Друя адзначае сваё 625-годдзе. Менавіта да гэтай падзеі і прымеркавана выстава, якая складаецца з цікавых раздзелаў, прысвечаных гістарычным эпізодам з жыцця горада. Асаблівую цікавасць для наведвальнікаў будуць уяўляць фотаматэрыялы з выявамі страчанай архітэктурнай спадчыны (як вядома, за гісторыю існавання месца было ўзведзена каля 20 культавых пабудоў), матэрыялы археалагічных даследванняў,якія прадстаўлены кафляй і паліваным посудам XVI ст, экспануюцца таксама копіі дакументаў і мапаў розных часоў.Шмат матэрыяла прысвечана вядомым гістарычным асобам: прадстаўнікам роду Сапегаў, расійскім грамадскім і палітычныя дзеячам, якія спрычыніліся да гісторыі Друі.

Зараз былы горад выраджаецца ў вёску, знішчана архітэктурная спадчына, страчана гандлёвая вартасць… Дык няхай жа экспазіцыя выставы дазволіць пабачыць Друю такой, якой яна была ў пачатку ХХ ст. – буйным цэнтрам з рамеснымі майстэрнямі і каледаскопам з велічных храмаў, “палестынай” для ўсіх: праваслаўных, каталікоў, іўдзееў…

Музей працуе з 9.00 да 18.00. Выходны - у панядзелак.