Вяселле – шкляное, адносiны – моцныя!

Гэтая сямейная пара з Чэрвеня – Сяргей і Аксана Калтовічы – яшчэ са школьных гадоў былі ўвесь час калі не побач, дык блізка адно ад аднаго. Яна – родам з Сельгастэхнікі, ён – з Астравоў. Абое заканчвалі СШ №4. І нават класы іх знаходзіліся непадалёк, у межах аднаго блока. А класнымі кіраўнікамі былі муж і жонка – Яўген Антонавіч і Аляксандра Пятроўна Несцяровічы.

Перш чым узяць шлюб, маладыя людзі сустракаліся тры з паловай гады. Мабільнікаў тады не было, вучыліся ў розных гарадах… Таму – пісьмы, пісьмы, пісьмы… Вось такі стары добры сродак сувязі, зараз амаль забыты…

Шлюб Сяргей і Аксана ўзялі 28 кастрычніка 15 гадоў таму. Мінулай восенню адсвяткавалі прыгожы юбілей – шкляное вяселле. Яго назва кажа пра чысціню і яснасць адносінаў мужа і жонкі. Родныя, знаёмыя, сябры гэтай пары сцвярджаюць – так яно і ёсць.

Гадуюць тата і мама дваіх дзетак – абаяльную Насцю і гарэзніка Дзяніску. Дачушка вучыцца ў шостым класе гімназіі, захапляецца танцамі. Займаецца ў школе мастацтваў па класу фартэпіяна. З задавальненнем удзельнічае ў гімназічным танцавальным калектыве «Lady in black» («Лэдзі ў чорным»). А яшчэ вельмі любіць ладзіць сустрэчы для ўсёй сям’і за прыгожа накрытым сталом. Сынок – першакласнік СШ №4, два разы на тыдзень наведвае спартыўную секцыю па футболе. Раздзяляе і яшчэ адно захапленне таты – рыбалку. Вось толькі пакуль не можа доўга ўсядзець на адным месцы…

Штогод сям’я Калтовічаў абавязкова святкуе дзень вяселля, падчас якога ладзіць рамантычную вячэру, праглядае відэакасету з запісам урачыстага дня. Адпачываюць Сяргей, Аксана, Насця і Дзяніс таксама ўсе разам. Усёй сям’ёй у выхадны могуць і ў футбол паганяць…

– Ідэальных сем’яў не бывае, — зазначыла ў гутарцы Аксана Калтовіч. – У любой здараюцца і спрэчкі, і непаразуменні…

Яно-то так… Але ж узаемнае каханне мужа і жонкі, іх любоў да дзяцей і дзяцей да бацькоў, прыязнасць у адносінах, агульныя сямейныя традыцыі, на мой погляд, здольныя пераадолець усе цяжкасці…

Святлана АДАМОВІЧ. Фота аўтара