23 ВЕРАСНЯ –ПАРЛАМЕНЦКІЯ ВЫБАРЫ

Завяршылася вылучэнне кандыдатаў у дэпутаты ад палітычных партый, працоўных калектываў і грамадзян шляхам збору подпісаў. Актыўна гэты  працэс праходзіў і ў нашым раёне. Днямі права вылучыць прэтэндэнта на месца ў парламенце  выкарыстаў працоўны калектыў райспажыўтаварыства. На канферэнцыі, якая адбылася ў  мінулую пятніцу, разглядалася пытанне аб  вылучэнні кандыдатам у дэпутаты  Палаты прадстаўнікоў Нацыянальнага сходу Рэспублікі Беларусь  па Бярэзінскай выбарчай акрузе №61, у якую ўваходзіць і наш раён,  намесніка старшыні Мінскага аблвыканкама Віктара Уладзіміравіча Шчэцькі. Гэтую прапанову ад імя калектыва выказаў старшыня райспажыўтаварыства Сяргей Веракса. Намеснік старшыні райвыканкама па сацыяльнай сферы і ідэалогіі Алла Шахоцька, прадставіла кандыдата ў дэпутаты і расказала аб яго жыццёвым і працоўным шляху. У прыватнасці, яна паведаміла, што нарадзіўся Віктар Уладзіміраіч у 1955 годзе ў вёсцы Растаў Кастрычніцкага раёна Гомельскай вобласці. З 1972 па па 1974 гады – навучэнец Бабруйскага сельскагаспадарчага  тэхнікума. З 1974 года па 1976 – служыў у радах Савецкай Арміі. Пасля войска працаваў галоўным эканамістам калгаса імя Кірава Глускага раёна Магілёўскай вобласці, затым галоўным эканамістам, намеснікам старшыні калгаса «Дружба» Глускага раёна, затым — старшынёй калгаса імя Чапаева Глускага раёна. У 1982 годзе скончыў Беларускі дзяржаўны інстытут народнай гаспадаркі і атрымаў   адукацыю эканаміста. З 1987 па 1994 гады Віктар Уладзіміравіч – старшыня Глускага раённага Савета дэпутатаў, а з 1994 па 1998 – старшыня Глускага раённага выканаўчага камітэта Магілёўскай вобласці. З 1998 па 2003 гады – старшыня Асіповіцкага раённага выканаўчага камітэта. З 2003 па 2007 гады – памочнік Прэзідэнта Рэспублікі Беларусь, галоўны інспектар па Гомельскай вобласці. З 2007 года В.У.Шчэцька працуе намеснікам старшыні аблвыканкама.

Сваё меркаванне аб дзелавых і асабістых якасцях  прэтэндэнта на вылучэнне  выказаў старшыня Чэрвеньскага раённага выканаўчага камітэта Іван Муха.  Ен падкрэсліў багаты ўпраўленчы вопыт  Віктара Уладзіміравіча, глыбокія веды сацыяльных праблем і  патрэб насельніцтва, канкрэтнае  бачанне заканадаўчага рэгулявання гэтых пытанняў,  неабыякавыя адносіны да людзей.

Падчас канферэнцыі іншых прапаноў  па кандыдатах на вылучэнне не паступіла. Было вырашана працэдуру  выбрання правесці  адкрытым галасаваннем. Уліковая камісіся канстатавала, што ўсе прысутныя  дэлегаты  аднагалосна прагаласавалі «за».

Кандыдат у дэпутаты  падзякаваў за аказаны давер,  расказаў аб сваей рабоце, перспектывах дзейнасці, пытаннях, што паспяхова  вырашаюцца ў сацыяльнай сферы і ў якіх існуюць пакуль праблемы, і паабяцаў, што ў выпадку выбрання яго дэпутатам у Палату прадстаўнікоў Нацыянальнага сходу Рэспублікі Беларусь, будзе актыўна  садзейнічаць развіццю Чэрвеньскага раёна.

Людміла РАБЕЦКАЯ.

Фота аўтара