«Адно акно» ў жыллёва-камунальным варыянце

Яшчэ год таму ўсе пытанні па атрыманню, абмену пашпарта вырашаліся  асноўным у аддзяленні па грамадзянству і міграцыі Чэрвеньскага РАУС. Зараз у адпаведнасці з Указам Прэзідэнта Рэспублікі Беларусь №200 ад 26 красавіка 2010 года многія з гэтых клопатаў бэрэ на сябе арганізацыя, якая ажыццяўляе эксплуатацыю жыллёвага фонду. У нашым раёне гэтай справай займаецца  інжынер па рабоце з насельніцтвам жыллёва-камунальнай гаспадаркі Таццяна Іванаўна Гаўрыльчык. Да таго ж, больш як дзесяць паслуг могуць атрымаць тут жыхары Чэрвеня. На кожную даводзіцца ад пяці да дзесяці хвілін. Таму амаль няма чэргаў. Сама болей чакаюць  2-3 чалавекі.

Працуе Таццяна Іванаўна на падставе заяўляльнага прынцыпу «Адно акно».

Пасля афармлення Таццянай Гаўрыльчык дакументаў новы пашпарт за невялікую плату ў 17.500 рублёў можна атрымаць праз месяц.  Такі тэрмін прадугледжаны заканадаўствам на гэтую адміністрацыйную працэдуру. А за дадатковую аплату — па паскоранаму варыянту праз два тыдні.  Наведвальніку загадзя скажуць, калі неабходна завітаць  па дакумент.

Таццяна Іванаўна выдае таксама рознага кшталту даведкі. Для атрымання неабходнай інфармацыі праз партал «Адно акно» ўстаноўлена сувязь з натарыяльнай канторай, Чэрвеньскім бюро тэхнічнай інвентарызацыі, раённым выканаўчым камітэтам, банкамі, Міністэрствам юстыцыі Рэспублікі Беларусь.

Уражваюць наступныя лічбы. За мінулы год па вусных заявах грамадзян выдадзена 9.063 даведак і іншых дакументаў, 95 — па запатрабаваннях дзяржаўных органаў. Ужо сёлета жыхарам Чэрвеня тут прадаставілі 1718 паслуг.

Аб»ём работы для аднаго чалавека даволі вялікі. Таццяне Іванаўне даводзілася нават дома вечарамі і ў выхадныя дні афармляць неабходныя дакументы.

– Цяпер будзе лягчэй, — з радасцю ў голасе зазначае яна. — Узялі ў штат яшчэ аднаго чалавека.

Нашу размову аб рабоце па заяўнаму прынцыпу «Адно акно» Таццяна Іванаўна прафесійна скарыстала для таго, каб праз газету праінфармаваць будучых заяўнікаў аб наступным: «У адпаведнасці з мерапрыемствамі па адмене дамавых кніг і арганізацыі ўліку грамадзян, якія пражываюць у аднакватэрных (блакіраваных) дамах неабходна да 1 красавіка 2011 года здаць дамавыя кнігі ў жыллёва-камунальную гаспадарку (г. Чэрвень, вул. Ленінская, 5) для таго, каб з 1 мая 2011 года адміністрацыйныя працэдуры па заявах грамадзян рабіць без прад`яўлення дамавых кніг.”

А.Ружын