Дома сцены дапамаглі

Чэрвень на працягу двух дзён прымаў IV абласную спартакіяду навучэнцаў устаноў, якія рыхтуюць кадры для аграпрамысловага комплексу Мінскай вобласці. Ладзіў яе абкам прафсаюза работнікаў АПК.

Спаборніцтвы прайшлі ў прафесійным будаўнічым ліцэі, на футбольнай пляцоўцы СДЮШАР і ў спартыўнай зале чацвёртай гарадской школы.

18 каманд вызначалі мацнейшых у валейболе або міні-футболе (на выбар), настольным тэнісе і мнагаборстве “Здароўе”. Акрамя таго, прадстаўнікі кожнага са спартыўных калектываў спаборнічалі ў дартсе.

Чэрвеньшчыну на спартакіядзе прадстаўлялі тры каманды – Смілавіцкіх сельскагаспадарчага ліцэя і аграрнага каледжа, а таксама – Чэрвеньскага будаўнічага ліцэя. Дзве з іх заваявалі большую частку ўзнагарод спаборніцтваў.

Першымі сталі вядомыя імёны пераможцаў мнагаборства “Здароўе”, якое ўключала ў сябе бег на кароткую і доўгую дыстанцыі, скачок у даўжыню з месца, падцягванне на перакладзіне (у юнакоў) і згінанне-разгінанне рук ва ўпоры (у дзяўчат). Тут поспех спадарожнічаў прадстаўнікам Чэрвеньскага будаўнічага ліцэя і Смілавіцкага аграрнага каледжа. Першыя месцы ў асабістым заліку па суме ўсіх відаў занялі Кацярына Метц (аграрны каледж) і Аляксей Марозаў (будаўнічы ліцэй), другое – Анастасія Цалуйка (будаўнічы ліцэй). Дзве верхнія прыступкі п’едэсталу ў камандным заліку мнагаборства “Здароўя” таксама аказаліся за спартсменамі Чэрвеньшчыны: першым стаў аграрны каледж, другім – будаўнічы ліцэй.

Завочнае саперніцтва гэтых дзвюх навучальных устаноў за абсалютную перамогу ў спартакіядзе працягвалася і ў астатніх дысцыплінах.

Футбольная каманда Чэрвеньскага будаўнічага ліцэя ў складзе Арцёма Аўраменкі, Мікіты Брэчкі, Паўла Умецкага, Руслана Красоўскага, Аляксея Ганчарыка, Максіма Аладкі і Паўла Лаўрыка спачатку ўпэўнена перамагла сваіх сапернікаў па групе: Мінск – 6:1, Валожын – 7:0 і Дзяржынск – 6:1, а потым у фінале нанесла паражэнні камандам са Слуцка – 2:1 і Клецка – 7:0 і заняла першае месца.

У спаборніцтвах валейбалістаў не было роўных камандзе Смілавіцкага аграрнага каледжа. Упэўненую перамогу ў турніры здабылі Анастасія Капітонава, Таццяна Ярашкова, Кацярына Афанасьева, Раман Цішкевіч, Віталь Чарняўскі, Пётр Казлоўскі і Сяргей Галаўня.

Вырашальным відам праграмы, які паўплываў на вынік барацьбы паміж чэрвеньцамі і смілаўчанамі за агульнакаманднае першынство, стаў настольны тэніс. У фінальную частку спаборніцтваў выйшла толькі адна спартсменка з гэтых каманд – прадстаўніца будаўнічага ліцэя Алёна Шыцько. І хаця дзяўчыне не ўдалося трапіць у тройку прызёраў, чацвёртага месца аказалася дастаткова, каб яе каманда стала трэцяй у настольным тэнісе і па найменшай суме месцаў, занятых ва ўсіх заліковых відах праграмы, апярэдзіла Смілавіцкі аграрны каледж.

У выніку Чэрвеньскі будаўнічы ліцэй святкаваў абсалютную перамогу ў спартакіядзе, Смілавіцкі аграрны каледж заняў другое месца, Уздзенскі сельгасліцэй – трэцяе. Не засталася без узнагарод, а гэта былі кубкі, медалі, Дыпломы і грашовыя прэміі, і каманда Смілавіцкага сельгасліцэя. Кіраўнік кафедры фізвыхавання гэтай навучальнай установы Павел Дзяркач паказаў другі вынік у спаборніцтвах па дартсу.

Вынікі спартакіяды засведчылі, што заняткі фізічнай культурай і спортам знаходзяцца сярод важнейшых прыярытэтаў вучэбна-выхаваўчай работы ў ліцэях і каледжах сталічнай вобласці, якія рыхтуюць кадры для сельскай гаспадаркі. На гэта падчас закрыцця спаборніцтваў звярнуў увагу старшыня абкама прафсаюза работнікаў аграпрамысловага комплексу Андрэй Някрэвіч.

— Мерапрыемства прайшло арганізавана, – зазначыў ён. – І не толькі ўласна спаборніцтвы, прысвечаныя Году моладзі, за напалам барацьбы якіх мы з захапленнем назіралі. Годнымі былі культурна-забаўляльная праграма для ўдзельнікаў, харчаванне і ўмовы пражывання. Спадзяюся, што разам з узнагародамі нашы навучэнцы прывязуць дахаты ўзнёслы настрой, незабыўныя ўражанні і ўспаміны.

Ігар АДАМОВІЧ.

Фота аўтара

На здымках: моманты спаборніцтваў; каманды Чэрвеньскага будаўнічага ліцэя і Смілавіцкага аграрнага каледжа выдатна прадставілі наш раён на спартакіядзе