«Чэрвеньскія балагуры» прывезлі гран-пры з фестывалю ў Польшчы

Народны жартоўны гурт «Чэрвеньскія балагуры» ў складзе мастацкага кіраўніка Андрэя Каленіка, Міхаіла Шчэрбача, Дзмітрыя Касцюкевіча, Аляксея Яблонскага, Івана Свірыдовіча, Уладзіміра Версана і Паўла Давідоўскага стаў уладальнікам Гран-пры велікоднага фестывалю «Міжнародныя спатканні з фальклорам» — статуэткі «Лобезская Баба Вяліканочная». Ён прайшоў у польскім горадзе Лобез і сабраў удзельнікаў з Польшчы, Беларусі, Чэхіі, Бельгіі, Сербіі і Украіны.

У намінацыі «Інструментальна-вакальныя калектывы» нашы артысты прадставілі на суд журы дзве полькі і вальс. Таксама «Чэрвеньскія балагуры» разам з польскім калектывам пад кіраўніцтвам Казіміра Маліцкага выканалі песню «Купалінка» і мелі гонар выступіць на сцэне Шчэцінскай філармоніі, якую ў музычным асяроддзі параўноўваюць са знакамітым оперным тэатрам «Ла Скала». А супрацоўнік Нацыянальнай бібліятэкі Беларусі Алег Сівы распавёў пра наш гурт на міжнароднай канферэнцыі «Народныя музычныя інструменты ў краінах Еўропы: гісторыя, развіццё, сучасны стан», якая сёлета ладзілася ў рамках фестывалю.

Паездка пакінула незабыўныя ўражанні, падарыла новыя цікавыя знаёмствы. Падчас фестывалю дасягнута дамоўленасць на візіт рабочай групы з Лобеза ў наш раён. Яна мае намер ацаніць аб’ём і магчымасці дапамогі ў рэстаўрацыі адзінага ў свеце музея кампазітара Станіслава Манюшкі ў пасёлку Азёрным. Адным з накірункаў падтрымкі можа стаць збор сродкаў праз арганізацыю ў Польшчы дабрачынных канцэртаў з твораў нашага знакамітага земляка.

Дарэчы, поспех прадстаўнікоў Чэрвеня — другі на гэтым фестывалі. Летась яго лаўрэатам і ўладальнікам спецыяльнага прызу — статуэткі «Лобезская Баба Вяліканочная» — стаў мастацкі кіраўнік «Чэрвеньскіх балагураў» Андрэй Каленік, які выступаў у намінацыі «Салісты-інструменталісты».

Аксана КАЧАНОВІЧ,

намеснік начальніка аддзела ідэалагічнай работы, культуры і па справах моладзі

Чэрвеньскага

райвыканкама.

Фота аўтара