ПАВІНШАВАЛІ 90-ГАДОВУЮ ЮБІЛЯРКУ

cherven.by Новости Червеня | 06-02-2014

У календары Надзеі Антонаўны Акімавай з Чэрвеня першага лютага – «чырвоная» дата, дзень народзінаў. Сёлета яна юбілейная: Надзеі Антонаўне споўнілася 90 гадоў. Павіншаваць юбілярку прыйшлі старшыня раённага Савета ветэранаў Іван Ладуцька і старшыня раённай арганізацыі беларускага прафсаюза работнікаў адукацыі і навукі Віталь Труш.

Надзея Акімава – ветэран педагагічнай працы, яе бесперапынны настаўніцкі стаж налічвае 36 гадоў. Нават будучы на заслужаным адпачынку, яна імкнулася быць побач з дзецьмі: пэўны час працавала выхавацелем у дзіцячым садку.

Нарадзілася Надзея Акімава ў шматдзетнай сям’і. Усе чатыры яе браты ваявалі: старэйшы Уладзімір – у савецка-фінскую вайну, Аляксандр, Мікалай і Антон – у Вялікую Айчынную. Апошні пайшоў у салдаты са студэнцкай лавы: напачатку 40-х ён вучыўся ў артылерыйскім вучылішчы. Аляксандр і Мікалай з фронта не вярнуліся.

Як і старэйшы брат, Уладзімір, пасля вайны яна настаўнічала. Скончыўшы гісторыка-філалагічнае аддзяленне Мінскага дзяржаўнага настаўніцкага інстытута па спецыяльнасці «беларуская мова, літаратура і гісторыя», выкладала ў Чэрвені, у другой школе. Яна ганарыцца сваімі былымі вучнямі. І гэтае пачуццё – узаемнае. Яны завіталі да Надзеі Антонаўны на дзень сустрэчы выпускнікоў, які сёлета супаў з яе юбілеем, – павіншаваць, успомніць школьны час, падзякаваць за сумленную працу і падтрымку.

Побач з Надзеяй Акімавай не толькі былыя вучні, але і родныя людзі: два ўнукі і нявестка. Нягледзячы на тое, што жывуць і працуюць яны ў Мінску, ледзь не штотыднёва лёгка пераадольваюць кіламетры, што ляжаць ад сталіцы да райцэнтра. Сваякам ёсць чым падзяліцца – ці то апошнімі навінамі, ці то цеплынёй і добрым словам.

Сняжана КАЎГАРЭНЯ.

Фота аўтара

Заметили ошибку? Выделите текст, нажмите Ctrl+Enter и оставьте замечание!

Написать комментарий

Информация

Чтобы написать комментарий вам нужно авторизоваться или зарегистрироваться

Обращались ли вы за помощью в милицию?