З ДЗЕЦЬМІ – ПРА СУР‘ЁЗНАЕ…

Мы даволі часта запрашаем спецыялістаў устаноў аховы здароўя, органаў унутраных спраў, службы Міністэрства па надзвычайных сітуацыях, прадстаўнікоў валяльна-лямцавай фабрыкі, прадпрыемстваў малога бізнесу, і  з кожным годам гэтыя сустрэчы робяцца больш цікавымі, праводзяцца ў нестандартнай форме.

Так, 23 лістапада ў Цэнтры праведзены мерапрыемствы, прымеркаваныя да Сусветнага дня дзіцяці. У госці мы запрасілі інспектара інспекцыі па справах непаўналетніх Чэрвеньскага РАУС Віталя Завадскага. На прэс-канферэнцыю па тэме «Закон і мы» завіталі дзеці, іх бацькі, педагогі. Выхаванцы Цэнтра атрымалі магчымасць задаць разнастайныя пытанні, пачуць кампетэнтныя адказы, абмеркаваць праблемы, якія датычацца не толькі іх саміх, але і дзяцей усёй краіны, а таксама равеснікаў з блізкага і далёкага замежжа.

Вучні малодшага школьнага ўзросту сталі ўдзельнікамі гульні-віктарыны «Падарожжа па казачных астравах». Яе мэта – пазнаёміць дзяцей з практыкай святкавання Сусветнага дня дзіцяці як Дня сусветнага братэрства і ўзаемаразумення.

30 лістапада мы ладзілі Дзень інфармавання па пытаннях павышэння ўзроўню ведаў выхаванцаў Цэнтра пра СНІД і ВІЧ-інфекцыю, іх прафілактыку. У якасці госця запрасілі галоўнага ўрача Смілавіцкай бальніцы Адрыяна Георгіевіча Гылку. Ён стаў арганізатарам і галоўнай дзеючай асобай дзелавой гульні «Мы выбіраем жыццё!»

Яе ўдзельнікі – дзеці розных узроставых груп, пачынаючы ад самых маленькіх і заканчваючы 16-гадовымі. Усім на здзіўленне, самымі актыўнымі аказаліся самыя маленькія! Мільён пытанняў, варыянты абмеркавання розных сітуацый, і як вынік – прыняцце правільнага рашэння. Хочацца спадзявацца, што і ва ўласным жыцці ўдзельнікі гульні будуць рабіць толькі правільны выбар.

Для вучняў старэйшага школьнага ўзросту мы правялі адукацыйны семінар «Планета супраць СНІДу». А яшчэ на працягу трох апошніх гадоў у Цэнтры ладзіцца конкурс малюнкаў на тэму барацьбы са СНІДам.

Мы ўпэўнены, што такія мерапрыемствы дапамогуць вучням павысіць узровень ведаў па прафілактыцы ВІЧ-інфекцыі і ўнесці свой маленькі ўклад у справу барацьбы са СНІДам.

Ірына ПАЗНЯК, культарганізатар Цэнтра творчасці дзяцей і моладзі г.п.Смілавічы