У Лідзе прайшоў фестываль «Слава на вышынях Богу»

Епархіяльны фестываль праваслаўных песнапенняў адбыўся ў Лідзе ўжо дванаццаты раз і сабраў поўную залу слухачоў.
Традыцыйнае для рэгіёну мерапрыемства ў гэтым годзе здолела здзівіць і нават заклала новыя традыцыі: фестываль пашырыў сваю геаграфію і ўпершыню выйшаў за межы Навагрудска-Лідскай епархіі – журы і гледачы змаглі пачуць галасы ўдзельнікаў з Гродзенскай і Пінскай епархій. Новай, нават цэнтральнай падзеяй стала і выступленне ансамбля Свята-Елісееўскага Лаўрышаўскага мужчынскага манастыра.
– Наколькі нам вядома, мы першы манастыр, які прымае ўдзел у гэтым фестывалі, – адзначыў кіраўнік ансамбля іерэй Яўген Барташэвіч. – Шчыра кажучы, чакалі ўбачыць не больш за 10 калектываў, а тут такая разнастайнасць. Вельмі радасна, што сярод удзельнікаў шмат дзяцей і моладзі – гэта сведчыць аб моцных праваслаўных традыцыях у епархіях, а таксама дае веру ў светлае будучае, у якім заўсёды будзе месца духоўнасці, малітве, дабрыні, адным словам, – Богу.

Большасць удзельнікаў фестывалю – прафесійныя музыкі. Як, напрыклад, квартэт моладзевага брацтва святога Даўмонта пры прыходзе храма Хрыста Збавіцеля ў Лідзе. Сустрэліся рабяты чатыры гады таму ў Лідскім музычным каледжы. Спецыяльна да фестывалю стварылі калектыў і так добра спеліся, што адразу сталі лаўрэатамі першай ступені. Ці то поспех так натхніў, ці то ідэальная музычная сумяшчальнасць, але артысты па-ранейшаму разам. Сёння квартэт паўтарыў поспех чатырохгадовай даўніны, і зноў стаў лаўрэатам фестывалю “Слава на вышынях Богу”.
– Выступаем мы не толькі на праваслаўных мерапрыемствах, але і на свецкіх, – распавяла рэгент ансамбля Аляксандра Рубан. – “У свеце” наш квартэт называецца “Tavia Reina” і перакладаецца як "край неба", што сімвалізуе бясконцасць.

Калі моладзевы квартэт здзіўляў чатырохгалоссем, шырынёй дыяпазону, то дзіцячы ансамбль храма Жыровіцкай іконы Божай Маці з Бярозаўкі, насупраць, – ідэальным аднагалосным унісонам.
Дзіцячы ансамбль храма Жыровіцкай іконы Божай Маці з Бярозаўкі таксама стаў лаўрэатам XII фестывалю “Слава на вышынях Богу”.
Усяго падчас фестывлю  выступілі крыху менш за 40 калектываў, у той час як у адборачным туры прымалі ўдзел больш як сто.
Фестываль праваслаўных песнапенняў "Слава на вышынях Богу" – унікальная падзея. Свята аб'ядноўвае духоўнае і свецкае жыццё, уражвае глыбінёй выканання твораў і – самае галоўнае – выклікае шчырую цікавасць. Ва ўсякім выпадку свабодных месцаў у зале на 450 месцаў Палаца культуры горада Ліды амаль не было.