У Рэчыцы самы буйны мікрараён застаўся без вады

18 верасня амаль з раніцы ў самым буйным мікрараёне Рэчыцы – Наварэчыцкім, з насельніцтвам каля 15 тысяч чалавек, адсутнічае водазабеспячэнне. Адмененыя заняткі ў школах і дзіцячых садках. Паводле чутак, якія распаўсюдзіліся па горадзе, вада будзе адсутнічаць да пятніцы. Але сёння ўдзень камунальнікі вывесілі на пад’ездах дамоў абвесткі, што ў сувязі з аварыяй водазабеспячэнне будзе адсутнічаць 18 верасня з 10 да 13 гадзін. Тым не менш, па стану на 21 гадзіну, вадазабеспячэнне мікрараёна не адноўленае. Жыхары скупілі ўсю бутэляваную ваду ў крамах мікрараёна, новага завозу бутэляванай вады не арганізавана. У крамах засталіся рэшткі пітной немінеральнай вады ў бутэльках дробнага аб’ёму. Улады забяспечылі падвоз вады палівачнымі цыстэрнамі, але, як сцвярджаюць самі кіроўцы гэтых машын, ваду гэтую ў ежу ўжываць яны б не раілі, бо гэта тэхнічная вада і ўжываць яе для піцця і прыгатавання ежы нельга. На звароты ў мясцовае прадпрыемства “Рэчыцаводаканал” (філіял КУП “Рэчыцкі райжылкамгас”) яго работнікі абвяргаюць такія звесткі, сцвярджаючы, што прывезеная палівачнымі цыстэрнамі вада, прыдатная для піцця. У той жа час, яны не абяцаюць аднаўлення падачы вады да раніцы 19 верасня.

Трэба адзначыць, што падобныя аварыі ў Наварэчыцкім мікрараёне Рэчыцы здараюцца з зайздроснай рэгулярнасцю. І калі раней пры адсутнасці вады ў шматкватэрным жылым фондзе, ў раёнах прыватнай забудовы па горадзе можна было набраць вады з вадаразборных калонак, то за апошні год “Рэчыцаводаканал” зрабіў немагчымым карыстанне калонкамі тымі, хто не мае адмысловых ключоў, якія выдаюцца прадпрыемствам пасля заключэння адпаведных дагавораў і аплаты кошту карыстання вадой з калонкі. Зараз у Наварэчыцкім стаяць чэргі каля палівачных цыстэрнаў і людзі ў аўтобусах вязуць пяцілітровікі пітной вады з крамаў іншых раёнаў горада.

Новость прислал анонимный источник. Администрация govorim.cc не несет ответственность за ее правдоподобность.