Экскурс у гісторыю: У адной фігурцы – цэлая эпоха

…Салдаты французскай імператарскай гвардыі зачаравана глядзелі на свайго лідара. Напалеон I Банапарт у сваім палявым адзенні з чырвоным плашчом прышпорыў баявога каня і звыклым жэстам аддаў загад…

Цудоўныя вобразы і захапляючыя фантазіі нараджаюць маленькія фігуркі, адлітыя ў пластыку, якія зрабіла рука сапраўднага майстра – дацэнта кафедры дызайну і праектавання інтэр’ераў Віцебскага дзяржаўнага ўніверсітэта імя Машэрава Ігара Гарбунова. Упершыню Кобрыншчына прымае імпрэзу Ігара Васільевіча пад назвай “Гістарычныя мініяцюры. Гісторыя ваеннага мундзіра”, якая аблюбавала залу  музея імя А.В. Суворава. Шматлікія наведвальнікі гэтай унікальнай выставы за лічаныя хвіліны ў думках пераносяцца ў розныя эпохі і ўяўляюць сябе ўдзельнікамі далёкіх падзей мінулага. З выдатнай дэталізацыяй, максімальна рэалістычна Ігар Гарбуноў стварыў сапраўдную армію, дзе яскрава прадстаўлены вайскоўцы з усёй Еўропы. Дарэчы, гэта хобі раз і назаўсёды заваявала розум і сэрца выкладчыка… у 38 гадоў!

- Ведаеце, прыкладна ў 1985 годзе было надзвычай складана займацца гэтым відам творчасці з-за адной толькі праблемы – практычна адсутнічала дакладная інфармацыя аб старажытным ваенным адзенні, у тым ліку і айчынных армій, – сведчыць мастак.  – І толькі дзякуючы дзейнасці моцнай суполкі энтузіястаў, грунтоўнай і паглыбленай навуковай рабоце з музеямі СССР удалося стварыць базу даных па гэтай тэматыцы. Менавіта так, на падставе атрыманай інфармацыі, і нарадзілася мая кніга “Мастацтва батальнай дыярамы”. Адзначу, што ў Беларусі ваенна-гістарычнай мініяцюрай займаецца не так шмат людзей, як, напрыклад, у Расіі ці ў краінах Заходняй Еўропы. Тым не менш, год ад году цікавасць да гэтага віду мастацтва ўзрастае. І гэта прамое сведчанне таго, што нашы суайчыннкі сталі больш цікавіцца летапісам свайго роднага краю.

У Ігара Гарбунова заўсёды ёсць што прапанаваць гледачам. Напрыклад, цікавая экспазіцыя магутных волатаў з Рымскай імперыі – прадстаўнікоў самай моцнай і лепшай арміі ўсіх часоў і народаў. Шырока прадстаўлены грэчаскія вайскоўцы. Асаблівай увагі заслугоўвае так званая “папская” гвардыя. Шмат фігур увасабляюць розныя мілітарыязаваныя падраздзяленні і злучэнні Англіі, Іспаніі, Германіі, Паўночнай Амерыкі і інш. Значная частка выставы – арміі, якія прымалі ўдзел у баявых кампаніях на тэрыторыі Беларусі ў розныя часы.

Набор мініяцюр “Рускія грэнадзёры 1812-1814 гг.” складаецца з цяжкай і лёгкай пяхоты, якія эфектыўна дзейнічалі ў баю ў спецыяльных калонах.  Таксама руская армія прадстаўлена ўсімі элітнымі падраздзяленнямі. Цэнтральны стэнд выставы прысвечаны вялікаму палкаводцу Аляксандру Сувораву і яго арміі. У склад экспазіцыі ўвайшоў і наш знакаміты зямляк Анджэй Тадэвуш Банавентура Касцюшка.

Выстава “Гістарычныя мініяцюры. Гісторыя ваеннага мундзіра” адкрыла дзверы для кожнага жадаючага. У час імпрэзы плануецца правесці майстар-класы для дзяцей па афарбоўцы фігурак. А завершыцца экспазіцыя ў пачатку кастрычніка.

Раман МЕЛЬНІК.

Фота аўтара.

На ЗДЫМКУ: Ігар Гарбуноў са сваёй работай.