Первая неожиданность чемпионата района по футболу

У перыяд з 12 па 21 ліпеня прайшлі сустрэчы 5 і 6 тураў адкрытага першынства раёна па футболе. У пятым туры фаварыты — каманды райспажыўтаварыства і “Будаўнік — ПМК-14” — пацвердзілі сваю моц. Першыя ў Ганцавічах перамаглі каманду Азярэчча з Клецкага раёна з лікам 8:0, а футбалісты з будаўнічай арганізацыі атрымалі перамогу з такім жа лікам у паядынку супраць СВК “Хатынічы”.

Самай цікавай і напружанай сустрэчай тура стала гульня ў Люсіне, дзе мясцовыя футбалісты ва ўпартай барацьбе перамаглі каманду “Дынама-2013”. Яшчэ адзін паядынак правялі паміж сабой каманды СВК “Будча” і Малькавічы. Тут мацнейшымі аказаліся футбалісты з Малькавіч, якія атрымалі перамогу з лікам 4:1.

І менавіта малькавіцкія футбалісты ўжо ў наступнай  гульні (гэта быў прапушчаны матч 4 тура) стварылі першую сенсацыю чэмпіянату. На сваім полі яны перамаглі аднаго з галоўных прэтэндэнтаў на перамогу ў першынстве — каманду райспажыўтаварыства.

Некалькі слоў пра каманду з Малькавіч. Мясцовы ўраджэнец Сяргей Лагвіновіч, які працуе ў Баранавічах, пры актыўнай падтрымцы старшыні Малькавіцкага сельвыканкама Н. П. Буйкевіч вырашыў стварыць каманду ў сваім аграгарадку. Ён сабраў некалькі мясцовых рабят, а таксама запрасіў сваіх сяброў з Баранавіч, якія з задавальненнем падтрымалі прапанову Сяргея і зараз паспяхова абараняюць гонар малькавіцкай каманды.

Малькавічы адкрылі лік у першым тайме. Футбалісты райспажыўтаварыства спрабавалі адыграцца, але небяспечных момантаў ля варот саперніка стварылі няшмат. У другім тайме ціск на вароты каманды з Малькавіч павялічыўся, аднак ганцаўчане так і не здолелі забіць гол, у той час як гаспадары правялі некалькі небяспечных контратак, адна з якіх на апошніх хвілінах гульні завяршылася другім голам у вароты каманды райспажыўтаварыства. Такім чынам, атрымалі перамогу малькавіцкія футбалісты з лікам 2:0.

Астатнія сустрэчы прынеслі наступныя вынікі: “Будаўнік — ПМК-14” — Люсіна — 6:2, СВК “Хатынічы” — ДЮСШ СВК “Агарэвічы” 6:1, Азярэчча — СВК “Будча” — 3:0.

Уладзімір САКАЛОЎ.