Са старадаўняга абрада зажынак распачалося жніво на Ганцаўшчыне

Напрыканцы мінулага тыдня, у пятніцу, для хлебаробаў раёна настаў доўгачаканы час — пачалося жніво. Нягледзячы на сюрпрызы надвор’я, якія падкідвала прырода сёлета, на ніве, дзякуючы руплівасці працаўнікоў сяла, выспеў важкі ураджай, і зараз неабходна прыкласці максімум намаганняў, каб хутка і да апошняга зярнятка сабраць яго.

Гаспадаркамі раёна  дзапланавана намалаціць не меней 32 тысяч тон збожжа. І для гэтага ёсць усе ўмовы. Віды на ўра-джай не горшыя, чым у мінулым годзе, і яго неабходна сабраць на плошчы ў 13070 гектараў. Для гэтага на ўборцы зернявых і зернебабовых культур будзе шчыраваць 57 камбайнаў. Абноўленая за апошнія гады зернесушыльная гаспадарка папоўнілася ў дадатак яшчэ дзвюма перасовачнымі мабільнымі сушылкамі, якія будуць задзейнічаны ў СВК “Бярозавец” і “Хатынічы”.

Стартавала жніво са старадаўняга абраду зажынак першага снапа ў СВК “Дубнякі”. На поле са схіленым долу ад цяжкага зерня калоссем, што знаходзіцца побач з зернесушыльным комплексам каля вёскі Перадзел, з’ехаліся кіраўнікі і спецыялісты гаспадарак раёна, каб прыняць удзел у свяце.

Распачалі абрад выконваючы абавязкі старшыні райвыканкама Уладзімір Давыдчык і старшыня СВК “Дубнякі” Уладзімір Грыгаран, якія перарэзалі чырвоную стужку на полі, даўшы старт жніву. Жнеі, спяваючы абрадавую песню, узяліся сярпамі зажынаць першыя залацістыя снапы, якія потым і паднеслі Уладзіміру Давыдчыку і Уладзіміру Грыгарану.

Перад выхадам камбайнаў у поле благаславіў працу хлебаробаў настаяцель Свята-Ціханаўскага храма, протаіерэй Пётр Піліпчук, для якога свята аказалася двайным — якраз у гэты дзень святых першавярхоўных апосталаў Пятра і Паўла ён нарадзіўся.

Нарэшце, адразу тры камбайны разам з Уладзімірам Давыдчыкам, намеснікам старшыні райвыканкама Юрыем Лелесам і Уладзімірам Грыгаранам зрабілі ганаровы круг па каласістаму полю. Першае сабранае зерне пачало запаўняць бункеры камбайнаў.

Пасля заканчэння абраду зажынак адразу ж была праведзена размова з кіраўнікамі і спецыялістамі гаспадарак па арганізацыі жніва.