Спортивный клуб «Медведь» организовал и провёл патриотический, военно-спортивный лагерь

Напачатку ліпеня ажыла закрытая з дзясятак гадоў таму школа ў Мельніках. На яе базе з 3 па 7 спартыўны клуб “Мядзведзь” арганізаваў работу патрыятычнага, ваенна-спартыўнага лагера, у якім адпачылі і з карысцю правялі час не толькі ганцаўчане, але і іх сябры з Мінска, Магілёва і Драгічына.

Усяго каля 40 чалавек (самаму малодшаму ўдзельніку споўнілася толькі 7 гадоў, самаму старэйшаму — 64) на працягу 5 дзён займаліся па даволі насычанай праграме. У яе ўваходзілі: заняткі па рукапашнаму бою, зборцы і разборцы зброі, фізічнай падрыхтоўцы. Таксама кожны жадаючы змог прайсці курс выжывання ў палявых умовах і горную падрыхтоўку (спецыяльна для гэтага сваю трэніровачную базу прадаставіў райаддзел па надзвычайных сітуацыях). Шмат часу адводзілася і на разнастайныя спартыўныя гульні, у тым ліку была магчымасць згуляць і ў страйк-бол (тактычная гульня са зброяй, якая страляе пластыкавымі шарыкамі). А вечарамі пад гарбату вяліся цікавыя гутаркі аб жыцці. Напрыканцы змены ўласнымі сіламі быў арганізаваны канцэрт, падчас якога і дарослыя, і дзеці прадэманстравалі свае творчыя здольнасці.   

Удзельнікі патрыятычнага лагера змаглі наведаць Ізбійскі Бор і памаліцца на гэтым святым месцы, пабывалі на службе ў Свята-Міхайлаўскім храме ў Начы, а настаяцель прыхода іерэй Дзмітрый Аскерка затым правёў экскурсію па вёсцы і расказаў шмат цікавага аб яе гісторыі. Дарэчы, вялікую дапамогу ў арганізацыі работы лагера аказалі менавіта праваслаўныя свяшчэннаслужыцелі — настаяцель Свята-Ціханаўскага храма, протаіерэй Пётр Піліпчук, а таксама айцец Дзмітрый.

 Фота

Аляксандра Дуліка.