О чемпионате района по футболу

Працягваецца адкрыты чэмпіянат раёна па футболе. На мінулым тыдні было згуляна два туры. Самымі напружанымі і цікавымі паядынкамі выдаліся тыя, што праходзілі ў Азярэччы і Ганцавічах. У ваенным гарадку сустракаліся мясцавая каманда і футбалісты з Малькавіч. На працягу ўсёй гульні паміж сапернікамі ішла роўная барацьба, аднак напрыканцы сустрэчы малькавіцкія футбалісты ўсё ж такі змаглі вырваць перамогу з лікам — 4:2.

У Ганцавічах у трэцім туры паміж сабой гулялі каманды ДЮСШ СВК “Агарэвічы” і “Дынама-2013” (Ганцавічы). Перавагай у гэтай гульні валодалі юныя футбалісты са спартыўнай школы. Яны адкрылі лік, мелі яшчэ некалькі вострых момантаў, але ў выніку прапусцілі гол у свае вароты. І фінальны свісток арбітра зафіксаваў нічыю — 1:1.

Галоўныя фаварыты спаборніцтваў — каманды райспажыўтаварыства і “Будаўнік — ПМК-14” — пакуль што не страцілі ў чэмпіянаце ніводнага ачка. Безумоўна, шматлікія аматары футбола (якіх, дарэчы, на гульнях першынства раёна збіраецца даволі шмат, прычым як у горадзе, так і ў іншых населеных пунктах) чакаюць сустрэчы гэтых каманд паміж сабой. Менавіта толькі паядынак апошняга тура, верагодней за ўсё, вызначыць чэмпіёна раёна.

У апошніх сваіх сустрэчах лідары перамаглі сапернікаў з буйным лікам: каманда райспажыўтаварыства ў Люсіна не пакінула ніводнага шансу мясцовым футбалістам, разграміўшы гаспадароў з лікам 18:1. А футбалісты з будаўнічай арганізацыі перамаглі сапернікаў з ДЮСШ СВК “Агарэвічы” з лікам 9:0.

У гэтыя дні прайшлі яшчэ дзве сустрэчы, якія прынеслі наступныя вынікі: СВК “Будча” — Люсіна — 4:1, СВК “Хатынічы” — “Дынама-2013” — 6:1.

Дарэчы, каманды, якія ўдзельнічаюць у першынстве, хацелі б падзякаваць арганізацыям і іх кіраўніцтву, якія аказваюць дапамогу і падтрымку футбалістам. А менавіта райвыканкаму, кіраўніцтву РАУС, райспажыўтаварыства, ПМК-14, а таксама СВК “Будча” і “Хатынічы”.

Уладзімір САКАЛОЎ. «СП» от 10 июля 2013 года