Второй этап чемпионата страны по спортивной ловле рыбы пройдёт на Ганцевщине

 У гэтыя выхадныя, 13-14 ліпеня, на вадасховішчы “Лактышы”, пройдзе 2 этап адкрытага чэмпіянату Рэспублікі Беларусь па спартыўнай лоўлі рыбы на летнюю паплавочную вудачку.

 Для аматараў рыбнай лоўлі правядзенне такога чэмпіянату — знакавая падзея, тым больш, што ў ім прымуць удзел некалькі соцень спартсменаў з усёй Беларусі — сапраўдных прафесіяналаў. У гэтым плане Ганцаўшчыне пашанцавала. Справа ў тым, што такі чэмпіянат на вадасховішчы “Лактышы” праводзіцца не ўпершыню — выдатнае месца для арганізацыі спаборніцтваў такога маштабу і падтрымка з боку мясцовай улады дазваляюць правесці адзін з этапаў чэмпіянату на самым высокім узроўні. На жаль, як паведаміў старшыня аргкамітэта Канстанцін Ціханаў, у ім могуць прыняць удзел толькі тыя спартсмены, якія выступаюць з першага этапа (усяго іх тры). Хаця для заўзятых рыбакоў сустрэцца з такімі ж аматарамі, пасачыць за імі ў час лоўлі, падзяліцца ўражаннямі і абмеркаваць убачанае — таксама выклікае надзвычайную цікавасць. Таму даводзім да ведама ўсіх аматараў рыбнай лоўлі, што збор удзельнікаў спаборніцтваў адбудзецца раніцай у суботу на дамбе вадасховішча, дзе пройдзе і брыфінг аргкамітэта, судзейскай калегіі і капітанаў каманд, а таксама будзе праведзена жараб’ёўка. Адкрыць чэмпіянат плануецца ў 9.30. Затым на працягу 30 хвілін спартсмены разыдуцца па сектарах і зоймуць месцы ў сваіх зонах лоўлі. На падрыхтоўку да яе і прыкормку рыбы даецца дзве гадзіны. І з 12.00 да 16.00 пройдуць непасрэдна самі спаборніцтвы, пасля чаго адбудзецца ўзважванне ўлову і падвядзенне прамежкавых вынікаў.

 На наступны дзень спаборніцтвы распачнуцца ў 11.00 і працягнуцца да 15.00. Затым судзейская калегія падвядзе канчатковыя вынікі.

 Запрашаем падтрымаць спартсменаў!