Миллионные штрафы

У краіне крыху больш за 5 гадоў устаноўлена крымінальная адказнасць за паўторнае кіраванне транспартнымі сродкамі ў стане алкагольнага ап’янення. Як паказвае практыка, гэтая мера адыгрывае пазітыўную прафілактычную ролю і прыводзіць да скарачэння фактаў згаданага віду злачынства.

Тым не менш, існуе праблема п’яных вадзіцеляў. У адпаведнасці са статыстычнымі данымі за 2012 год, на Ганцаўшчыне за язду ў стане алкагольнага ап’янення ўпершыню затрыманы 124 чалавекі, з якіх 45 —не мелі вадзіцельскіх правоў. За 5 месяцаў з пачатку бягучага года да адміністрацыйнай адказнасці прыцягнута яшчэ 37 выпівак.

У мэтах прафілактыкі злачынстваў, пракуратурай раёна аб’яўляюцца афіцыйныя папярэджванні асобам, якія раней трапляліся п’янымі за рулём. Але ўсё ж такі знаходзяцца індывідуумы, якія думаюць, што законы напісаны для каго заўгодна, але толькі не для іх. З пачатку года раённым аддзелам Следчага камітэта Рэспублікі Беларусь  узбуджана 5 крымінальных спраў па фактах паўторнага кіравання транспартным сродкам у стане алкагольнага ап’янення (у мінулым годзе за гэты ж перыяд — 4).

Аналіз практыкі назначэння пакаранняў па такіх крымінальных справах сведчыць, што пазіцыя дзяржаўных абвінаваўцаў і суда раёна па вызначэнні віду і памеру пакарання ў асноўным супадае.

Асноўнымі відамі пакарання сталі пазбаўленне права займацца дзейнасцю, якая звязана з кіраваннем транспартным сродкам, тэрмінам на 5 гадоў і штраф. Яго сярэдні памер складае 30 мільёнаў рублёў.

У мэтах забеспячэння выканання прысудаў у выглядзе штрафаў, органамі папярэдняга расследавання накладваюцца арышты на маёмасць вінаватых, у тым ліку і на іх уласныя транспартныя сродкі.

Практыка паказвае, што найбольш эфектыўнае прафілактычнае ўздзеянне на правапарушальнікаў аказвае прымяненне такога віду пакарання, як штраф памерам звыш 300 базавых велічынь (30 мільёнаў рублёў). А больш мяккае пакаранне не заўсёды аказвае станоўчы ўплыў. У сувязі з гэтым дзяржаўныя абвінаваўцы арыентаваны на вызначэнне штрафу па справах да-дзенай катэгорыі ў памеры ад 300 да 1000 базавых велічынь.

Неабходна адзначыць, што асобе, якая паўторна на працягу года кіравала транспартным сродкам у стане алкагольнага ап’янення, можа быць назначана пакаранне ў выглядзе арышту тэрмінам да 6 месяцаў з пазбаўленнем права займаць пэўныя пасады ці займацца пэўнай дзейнасцю, абмежавання свабоды да 2 гадоў на тых жа ўмовах ці ўвогуле пазбаўлення свабоды на гэты ж тэрмін.

Напрыклад, 25 лютага 2013 года жыхар райцэнтра за паўторнае кіраванне аўтамабілем на падпітку быў асуджаны да 5 месяцаў арышту з пазбаўленнем вадзіцельскіх правоў на 5 гадоў.

Каб выключыць факты кіравання транспартнымі сродкамі ў стане алкагольнага ап’янення, дзяржаўныя абвінаваўцы пракуратуры раёна і надалей будуць арыентаваць суд на вынясенне больш строгіх пакаранняў асобам, якія здзейснілі згаданае злачынства.

Хацелася б у чарговы раз папярэдзіць тых, хто не разумее ўсёй сур’ёзнасці праблемы: суровае пакаранне непазбежна.

Міхаіл Кляўцэвіч,

намеснік пракурора

Ганцавіцкага раёна.