Нашёл себя в вольной борьбе

Вольная барацьба заўсёды была і застаецца адным з самых паспяховых відаў спорту на Ганцаўшчыне. Многія нашы барцы маюць званне майстроў спорту, неаднаразова станавіліся чэмпіёнамі і прызёрамі розных рэспубліканскіх спаборніцтваў. Вядома, што вялікая заслуга ў выхаванні спартсменаў належыць іх трэнерам. У іх ліку і Аляксей Клявец . Ён працуе ў СДЮШАР адносна нядаўна, аднак, ведаючы пра поспехі яго выхаванцаў, вырашыў бліжэй пазнаёміцца з гэтым маладым чалавекам, які ўжо дасягнуў неблагіх вынікаў у трэнерскай справе.

Аляксей нарадзіўся ў Ганцавічах у 1985 годзе. Яго захапленне спортам пачалося яшчэ са школы. Аднак спачатку будучаму трэнеру па вольнай барацьбе падабаўся далёка не гэты від спорту. Юнак захапляўся цяжкай атлетыкай, шмат вольнага часу праводзіў у трэнажорнай зале. Да таго ж у старэйшых класах займаўся ў спецыялізаваным класе МНС. Актыўна, як і многія яго аднакласнікі з СШ № 1, захапляўся пажарным спортам.

Пасля заканчэння школы Аляксей паступіў у Беларускі дзяржаўны ўніверсітэт фізічнай культуры. Там малады чалавек атрымаў спецыяльнасць “трэнер-выкладчык па цяжкай атлетыцы”. Аднак адразу пачаць працоўную дзейнасць Аляксею не давялося: пасля заканчэння ВНУ  год адслужыў у арміі. Фізічна і маральна ён загартоўваўся ў пагранічных войсках у Гродне.

Вярнуўшыся дадому, А. Клявец пачаў захапляцца барацьбой. Яго здольнасці заўважыла кіраўніцтва мясцовай СДЮШАР. І з 2012 года Аляксей узяўся трэніраваць маладых ганцавіцкіх рабят. Прычым сярод яго выхаванцаў ёсць як хлопцы, так і дзяўчаты. Калі пацікавіўся ў трэнера, з кім цяжэй працаваць, ён адказаў: “І з хлопцамі, і з дзяўчатамі працаваць аднолькава цяжка. Да кожнага трэба знайсці індывідуальны падыход. Калі гэта ўдаецца, то і вынік атрымліваецца станоўчы”.

Дзякуючы старэйшым калегам, а таксама свайму імкненню да самаўдасканалення, з цягам часу Аляксей усё больш набіраўся вопыту. Цяпер вынікі яго трэнерскай дзейнасці відавочны. За непрацяглы перыяд сваёй работы ў СДЮШАР А. Клявец падрыхтаваў некалькі чэмпіёнаў і прызёраў вобласці. Яго выхаванцы Таццяна Блінкоўская і Дар’я Вялічка нядаўна сталі прызёрамі, а Паліна Бялецкая — чэмпіёнкай Беларусі па вольнай барацьбе!

Але не толькі барцоў-чэмпіёнаў выхоўвае Аляксей. Разам з жонкай Вольгай, якая зараз знаходзіцца ў водпуску па догляду дзіцяці, яны гадуюць сыночка Глеба. Дарэчы, па словах Аляксея, у будучым свайго сына ён таксама жадаў бы аддаць у якую-небудзь спартыўную секцыю.

Малады, але ўжо даволі паспяховы трэнер не збіраецца спыняцца на дасягнутым. А. Клявец і надалей  будзе трэніраваць рабят, якія б у будучым праслаўлялі не толькі наш раён, але і нашу краіну.

Уладзімір САКАЛОЎ.

Фота аўтара.