В плену у паводка

Сёлетняй вясной спакойныя палескія рэкі сталі, чаго даўно не было, паўнаводнымі, выйшлі з берагоў.  Меліярацыйныя каналы — гэтая транспартная сістэма водарэгулявання — не спраўляюцца з адводам  лішняй вады. Ад гэтага церпяць насельніцтва, усе сельгаскааператывы Ганцаўшчыны.

Надзвычайная сітуацыя па сённяшні дзень захоўваецца  ў Люсінскім сельсавеце. Старшыня сельвыканкама В. А. Шкут канстатуе, што на пачатку красавіка было некалькі зваротаў жыхароў Люсіна. Падтопленымі аказаліся падвор’і жыхароў па вуліцах Крупеніча і Камсамольскай. У першым выпадку ў канаве ўтварыўся затор з лёду, і вада пайшла ў агароды і паграбы вяскоўцаў. Мясцовая ўлада аператыўна звязалася з раённымі службамі. Сумеснымі намаганнямі выратавальнікаў і работнікаў прадпрыемства меліярацыйных сістэм пагроза была ўхілена.

Намнога складаней сітуацыя на меліяраваных землях сельгаскааператыва “Цельшына”. Зонай затаплення сталі пасевы азімых культур, пад вадой аказаліся сенажаці, пашы, куды дабрацца можна хіба што на лодцы. Старшыня СВК “Цельшына” А. Ц. Амельяновіч расказвае, што ў пойме ракі Цна пад вадой 60 гектараў азімага рапсу, 90 гектараў трыцікале, 50 гектараў азімага жыта, 300 гектараў траў. І гэта ўказаны плошчы, дзе паверх стаіць вада. Шмат пераўвільготненых участкаў.

Сапраўды, у ваколіцах вёскі Макава, якая стаіць на левабярэжжы Цны, вада на палетках сельгаскааператыва літаральна адразу за агародамі вяскоўцаў. Але яшчэ больш уражвае малюнак,  калі праехаць уздоўж ракі Цна ў паўднёвым напрамку. Фактычна адна толькі палявая дарога ўзвышаецца над каналамі і над ракой, дзе ўзровень вады, як і той, што плешчацца ў каналах і на палетках.

У такіх умовах вясеннія работы па падрыхтоўцы глебы і сяўбе, па падкормцы азімых, шматгадовых траў вядуцца ў гаспадарцы на тых нешматлікіх участках, куды можа дайсці тэхніка. На іншыя затопленыя і на пераўвільготненыя землі можна будзе дабрацца, калі сыдзе вада.

На жаль, меліярацыйны праект, увасоблены на землях СВК “Цельшына”, спасаваў перад сёлетняй паводкай. І спецыялістам варта разабрацца, чаму земляробы аказаліся каля “разбітага карыта” — у чаканні сыходу вялікай вады, і вырашыць,  што неабходна зрабіць, каб падобная сітуацыя не паўтарылася ў наступныя вёсны.

НА ЗДЫМКАХ: старшыня сельвыканкама В. А. Шкут: паводкавыя воды каля падворкаў у Макаве;  сярод пасеваў СВК “Цельшына” сухая толькі дарога.

Тэкст і фота

Мікалая ЛОЙКІ.