В СПК «Крышыловичи» – новый председатель

Калі сцісла характарызаваць вытворчыя справы і фінансавае становішча гэтай гаспадаркі, то яны вельмі складаныя.  У абласных зводках пазіцыі сельгаскааператыва (па розных паказчыках размяшчаецца прыкладна 250 калектываў) у ліку замыкаючых табліцу і пачынаюцца з 226 месца і ніжэй. Менавіта так выглядаюць здабыткі працаўнікоў СВК “Крышылавічы” па сярэднясутачных прывагах, надоях на карову, ураджайнасці зерня і г. д. Як вынік, і  па заробках таксама.

Ранейшы кіраўнік кааператыва Уладзімір Іванавіч Мышкавец на нечарговым сходзе, што адбыўся ў Востраве 19 сакавіка, сваёй заявай сам паставіў пытанне аб замене яго новым чалавекам, матывуючы тым, што з улікам стану здароўя  службовыя абавязкі перавышаюць яго магчымасці выконваць іх у поўным аб’ёме.

Зала ўспрыняла такую заяву вельмі насцярожана. Перамены — гэта ў пэўнай ступені крок у невядомае. Аднак на просьбу трэба адклікацца. Тым больш, што начальнік райсельгасхарчу Юрый Уладзіміравіч  Лелес, характарызуючы цяперашнюю сітуацыю ў сельгаскааператыве, падвёў размову да вываду, што трэба неадкладна настройвацца на работу па выхаду з крызісу і штодзённа працаваць закасаўшы рукавы, каб забяспечыць не толькі выжыванне гаспадаркі, але і развіццё ўсіх галін сельгасвытворчасці.

Галоўныя спецыялісты сельгаскааператыва, што выступілі на сходзе, таксама выказаліся за перамены, за навядзенне больш жорсткай дысцыпліны і парадку, за павышэнне эфектыўнасці вытворчасці сумеснымі намаганнямі.

Раённы выканаўчы камітэт рэкамендаваў на пасаду старшыні сельгаскааператыва “Крышылавічы” Сяргея  Іванавіча Хадатчука. Перш за ўсё звяртае на сябе ўвагу тая акалічнасць, што ён набываў вышэйшую адукацыю ў Белдзяржсельгасакадэміі, затым  — у Брэсцкім дзяржтэхуніверсітэце. За гады навучання атрымаў спецыяльнасці “эканоміка і кіраванне ў галінах аграпрамысловага комплексу” і ”менеджмент у аграпрамысловым комплексе”. Мае вопыт практычнай работы на розных пасадах, у тым ліку працаваў старшынёй сельгаскааператыва “Чучавічы”, што ў Лунінецкім раёне, апошнім часам — намеснікам дырэктара па сельгасвытворчасці ААТ “Мядзельаграсэрвіс” на Міншчыне.

Прапанова райвыканкама знайшла падтрымку ва ўдзельнікаў сходу. Яны прагаласавалі за выбранне старшынёй СВК “Крышылавічы” С. І. Хадатчука. З  новай пасадай і пажаданнямі плённай працы яго павіншаваў старшыня райвыканкама А. П. Саланевіч, які ўдзельнічаў  і выступаў перад упаўнаважанымі сходу.

Мы папрасілі Сяргея Іванавіча падзяліцца першымі ўражаннямі  пасля знаёмства з гаспадаркай і сваім бачаннем асновы, на якой будуць рэалізоўвацца планы развіцця. На думку новага старшыні, ёсць людзі, якіх трэба расставіць і граматна арганізаваць іх работу, ёсць спецыялісты. А гэта адна з вельмі важных умоў рэалізацыі намечаных на сёлетні год планаў.

Мікалай ЛОЙКА.