Ганцевчане приняли участие в международном молодёжном форуме в Москве

На пачатку жніўня ў Маскве на працягу пяці дзён праходзіў міжнародны маладзёжны форум пад назвай “Апека зямлі”, у якім прынялі ўдзел дэлегацыі з ЗША, Вялікабрытаніі, Іспаніі і розных рэгіёнаў Расіі.

Дзякуючы падтрымцы індывідуальнага прадпрымальніка Валерыя Віктаравіча Мухі, а таксама нашага земляка Аляксея Паўлавіча Пракаповіча, які ўзначальвае адзін з аддзелаў Цэнтра падрыхтоўкі касманаўтаў, удзел у форуме прынялі і выпускнікі гімназіі горада Ганцавічы Аляксей Кірыковіч і Мікалай Радкевіч. Тое, што выбралі менавіта гэтых юнакоў, невыпадкова. Сёлета і Аляксей, і Мікалай сталі студэнтамі вышэйшых навучальных устаноў без уступных іспытаў, а па выніках заключнага этапа рэспубліканскіх алімпіяд (па геаграфіі і біялогіі адпаведна), Аляксей Кірыковіч паступіў на геаграфічны факультэт Беларускага дзяржаўнага ўніверсітэта, а Мікалай Радкевіч стаў студэнтам стаматалагічнага факультэта Беларускага дзяржаўнага медыцынскага ўніверсітэта.

Як адзначыла дырэктар гімназіі Іна Уладзіміраўна Бараноўская, арганізацыя форуму была на вельмі высокім узроўні, удзел у ім пакінуў у рабят шмат станоўчых эмоцый і ўражанняў. На працягу пяці дзён А. Кірыковіч і М. Радкевіч актыўна ўдзельнічалі ў абмеркаванні пытанняў наконт бяспекі і захавання нашай планеты па тэмах: “Чаму асваенне космасу мае важнае значэнне для выжывання Зямлі?”, “Здароўе зямляніна — аснова здароўя Зямлі” і іншых, а таксама прынялі ўдзел у распрацоўцы своеасаблівага кодэкса гонару для грамадзян нашай планеты. Навуковая дзейнасць нашых юнакоў спалучалася са шматлікімі экскурсіямі, якія арганізатары прапаноўвалі гасцям з іншых краін. Дарэчы, як паведаміла І. У. Бараноўская, у адрозненне ад большасці юнакоў і дзяўчат, якія карысталіся паслугамі перакладчыкаў, і Аляксей, і Мікалай даволі ўпэўнена размаўлялі з удзельнікамі форуму на англійскай мове.

На працягу пяці дзён форуму нашы рабяты наведалі Цэнтр кіравання касмічнымі палётамі ў горадзе Каралёве, мемарыяльны музей касманаўтыкі, Цэнтр падрыхтоўкі касманаўтаў імя Ю. А. Гагарына, паназіралі за паказальнымі выступленнямі выратавальнікаў з выратавальнага цэнтра МНС горада Нагінска, кінолагаў, а таксама мелі магчымасць пагутарыць з міжнародным экіпажам касманаўтаў, які зараз знаходзіцца на арбіце Зямлі.

Уладзімір САКАЛОЎ.

НА ЗДЫМКУ: падчас міжнароднага форуму Аляксей Кірыковіч, Мікалай Радкевіч і Іна Уладзіміраўна Бараноўская разам з расійскім касманаўтам Аляксандрам Волкавым.

Фота з архіва гімназіі

г. Ганцавічы.