В Ганцевичском районе сев озимого рапса должен быть завершён до 25 августа

Не паспеў заціхнуць гул камбайнаў, што ўбіралі хлебныя палеткі, як пачалася новая пасяўная кампанія — наступілі аптымальныя тэрміны для сяўбы азімага рапсу. Аб планах і ходзе пасяўной кампаніі супрацоўнік “СП” Мікалай ЛОЙКА папрасіў расказаць галоўнага агранома райсельгасхарчу Міхаіла Іванавіча КАНАНОВІЧА.

— Сёлетні год парадаваў дбайных гаспадароў добрым ураджаем гэтай алейнай культуры. Да прыкладу, у СГВК “Любашава” на круг атрымалі насення азімага рапсу па 32,8 цэнтнера. Складаемымі такога поспеху сталі якасныя падрыхтоўка глебы і сяўба. Пасевы былі своечасова падкормлены мінеральнымі ўгнаеннямі, расліны абаронены сродкамі хімічнай аховы ад захворванняў і шкоднікаў. Таму і надвор’е спрыяла руплівым земляробам. Разам з тым у сельгаскааператыве “Хатынічы” сабралі крыху больш чым па 10 цэнтнераў з гектара. Словам, як пастараліся, такі ўраджай і атрымалі.

Аб эфектыўнасці намаганняў, граматным падыходзе да выканання ўсяго комплексу работ па фарміраванню будучага ўраджаю трэба сур’ёзна задумацца ўсім кіраўнікам, агранамічным службам гаспадарак. Сёлета асенняя пасяўная кампанія па гэтай культуры вызначана заданнем у аб’ёме 2360 гектараў. Земляробы раёна гэтымі днямі займаліся падрыхтоўкай глебы, уносяць арганіку, якой нарыхтавана 100 працэнтаў да патрэбнасці, маюць насенне і адпаведную тэхніку для правядзення пасяўной. Найбольш актыўна работы ідуць у СВК “Цельшына”, дзе азімы рапс размешчаны на 102 гектарах, што складае 68 працэнтаў да задання, і ў СВК “Дубнякі”, дзе засеяна амаль 60 працэнтаў запланаваных плошчаў. У цэлым жа па раёну па стану на 17 жніўня сяўба праведзена на 16 працэнтах плошчаў. Марудна вядуцца работы райаграсэрвісам на палетках сельгасучастка “Дзяніскавічы”, дзе плануецца размясціць азімы рапс на 300 гектарах, але фактычна глеба падрыхтавана толькі на 42,7 працэнта плошчаў. Шэраг гаспадарак збіраюцца пачаць сеяць у бліжэйшыя дні.

У гэтай сувязі хацелася б нагадаць, што завяршыць сяўбу неабходна да 25 жніўня, калі заканчваецца аптымальны перыяд для размяшчэння данай культуры. Таму ўся работа павінна весціся з арыенцірам на гэтыя тэрміны. Каб закласці трывалы падмурак для будучага ўраджаю, гаспадаркі маюць усё неабходнае: забяспечаны насеннем, мінеральнымі і арганічнымі ўгнаеннямі, ёсць неабходная тэхніка. Пры належнай арганізацыі працы і высокай выканаўчай дысцыпліне ствараюцца перадумовы для атрымання запланаваных ураджаяў.