Для участия в международном фестивале “Мотальскія прысмакі” ганцевичские мастера получили персональное приглашение

На V міжнародным кулінарным фестывалі, што прайшоў у мінулую нядзелю ў старажытным мястэчку Моталь Іванаўскага раёна пабывала і дэлегацыя самабытных майстроў Ганцаўшчыны. З добрым настроем і шматлікімі ўражаннямі вярнуліся з міжнароднага фэсту ўдзельнікі клуба “Багач” раённага Дома рамёстваў, якія не толькі пакаштавалі мотальскіх прысмакаў, але і паказалі гасцям свята свае непаўторныя работы.

— На фестываль мы трапілі не выпадкова, а па запрашэнню арганізатараў міжнароднага фэсту, — расказвае дырэктар раённага Дома рамёстваў Марыя Іванаўна Муха. — Яшчэ падчас правядзення ў Ганцавічах, у чэрвені сёлетняга года, міжнароднага семінара па захаванню традыцый і развіццю новых відаў народных промыслаў вырабы нашых майстроў не пакінулі раўнадушнымі, бадай, нікога. І як вынік — арганізатары “Мотальскіх прысмакаў” нашых умельцаў запрашалі персанальна. Хочацца выказаць асобную падзяку і аддзелу культуры райвыканкама, які дапамог нам з транспартам.

Свае работы ў Моталі прадстаўлялі народны майстар, цудоўная ткачыха Ніна Казак, мастачка Лілія Кудравец, рукадзельніца Галіна Пупач, мастак Аляксандр Кульбіцкі і ганчар Віталь Шапялевіч. Дарэчы, падчас міжнароднага фэсту Віталь паказаў на сваім ганчарным крузе майстар-клас, дзе на вачах шматлікіх гледачоў нараджаліся непаўторныя вырабы з керамікі. З задавальненнем збаночкі, вырабленыя ўмелымі рукамі ганчара, набывалі на выставе-кірмашы.

— Нас уразіла арганізацыя свята, — працягвае гаворку Марыя Іванаўна. — У імправізаваных павільёнах былі прадастаўлены месцы для майстроў. Ведаеце, на першы погляд усё проста зроблена, але з якім густам была аформлена і плошча, і гандлёвыя рады, і адмысловы “горад майстроў”! Мы не толькі сябе паказалі, але і паглядзелі на вырабы і падзелкі ўмельцаў з іншых рэгіёнаў вобласці і рэспублікі.

— На такіх імпрэзах найперш вабяць сустрэчы з цікавымі людзьмі і старымі знаёмымі, — далучаецца да размовы народны майстар Ніна Мікалаеўна Казак.

Зрэшты, Ніна Мікалаеўна заўзятая ўдзельніца шматлікіх фэстаў і народных свят, на якіх яе ручнікам няма роўных. Вось і ў гэтыя дні наша ткачыха зачароўвае сваімі вырабамі і віртуозным майстэрствам ткацтва ўдзельнікаў Ягелонскага кірмашу, што з 17 па 19 жніўня ладзіцца ў польскім горадзе Любліне.

Кацярына ЯЦУШКЕВІЧ.

НА ЗДЫМКУ: прыгожыя ручнікі атрымліваюцца ў ткачыхі Ніны Мікалаеўны Казак.

Фота аўтара.