В отдельных сельхозкооперативах Ганцевичского района у работников возникают вопросы по начислению заработной платы

На мінулым тыдні ў рэдакцыю “СП” звярнуўся жыхар вёскі Малькавічы Рыгор Фёдаравіч Занька з вось якім пытаннем.

Яго сын працаваў па дагавору вартаўніком у СВК “Малькавічы” і пасля далучэння гэтага сельгаскааператыва да СВК “Бярозавец” працягваў выконваць свае абавязкі, але за чэрвень яму не налічылі заработную плату. Спецыялісты СВК, па словах Рыгора Фёдаравіча, матывавалі гэта тым, што прозвішча яго сына нават няма ў табелі ўліку рабочага часу, а значыць, атрымліваецца, што ён і не працаваў. Гэта ў тэлефоннай размове пацвердзіў і сам сын — Аляксандр Рыгоравіч Занька.

Каб разабрацца ў сітуацыі, разам з намеснікам начальніка ўпраўлення па працы, занятасці і сацыяльнай абароне райвыканкама Анатолем Мікалаевічам Вольнічам выехалі ў вёску Ганцавічы, дзе знаходзіцца праўленне гаспадаркі і сустрэліся са старшынёй СВК “Бярозавец” Уладзімірам Уладзіміравічам Бяловым.

Ён патлумачыў, што праблемы ўзніклі з-за самога Рыгора Фёдаравіча Занькі, які да нядаўняга часу працаваў у Малькавічах загадчыкам складоў і сярод яго падначаленых быў і сын. У службовыя абавязкі Рыгора Фёдаравіча ўваходзіла вядзенне табелю ўліку рабочага часу, што, па сутнасці, не рабілася. У тых паперах, напісаных яго рукой, якія прадэманстравалі адказныя спецыялісты сельгаскааператыва, цяжка ўвогуле нешта зразумець, што пацвердзіў і Анатоль Вольніч. Таксама старшыня СВК адзначыў, што ў свой час з загадчыкам складоў ішла размова аб належным вядзенні дакументацыі. Той абяцаў навучыцца гэта выконваць і прывесці ўсё ў парадак, але працягваў працаваць па-старому. Таму Рыгору Фёдаравічу і прапанавалі перавесціся на пасаду слесара, аднак ён палічыў за лепшае звольніцца па ўласнаму жаданню.

Што датычыцца яго сына, то дакументальна зафіксавана, што ў чэрвені, падчас трох праверак, двойчы самім старшынёй і адзін раз супрацоўнікамі міліцыі, Аляксандр Рыгоравіч Занька адсутнічаў на рабочым месцы. Тым не менш, гэтая акалічнасць, разам з адсутнасцю яго прозвішча ў табелі ўліку рабочага часу, не можа быць падставай для пазбаўлення чалавека заработнай платы, з чым пагадзіўся і Уладзімір Уладзіміравіч Бялоў. Ён даў даручэнне адказным спецыялістам разабрацца з дакументамі і налічыць Аляксандру Рыгоравічу зарплату, якая яму належыць.

У сваю чаргу, Анатоль Мікалаевіч Вольніч звярнуў увагу на тое, што кожнае дзеянне адміністрацыі арганізацыі ці прадпрыемства павінна быць абгрунтаваным і абапірацца на нарматыўныя дакументы. А тое, што нехта з работнікаў, не вёў табель уліку працоўнага часу, найперш, упушчэнне адказных спецыялістаў СВК.

Павел СВІСТУНОВІЧ.