В Ганцевичах ведётся расследование очередного несчастного случая на производстве

На мінулым тыдні на КУВП “Ганцавіцкі камбінат панэльнага домабудавання адбыўся няшчасны выпадак на вытворчасці.

Здаўна заўважана, што пакуль гром не грымне, мужык не перахрысціцца. Падобная логіка, на жаль, прысутнічае па сённяшні дзень у паводзінах людзей у быце і на вытворчасці.

З пачатку года на Ганцаўшчыне зафіксавана 8 няшчасных выпадкаў, у тым ліку тры — з цяжкімі вынікамі. Іх магло б не быць, калі б захоўваліся правілы тэхнікі бяспекі. Апошнім напамінкам аб існуючых праблемах у гэтай сферы стала здарэнне, што адбылося днямі на КУВП “Ганцавіцкі КПД”. 1 жніўня ў цэнтральную раённую бальніцу паступіла Вольга Міхайлаўна Чэрнік, якая працуе на КПД кранаўшчыцай. У час выканання вытворчых абавязкаў, бетоннай плітой ёй нанесена закрытая чэрапна-мазгавая траўма. У абставінах гэтага здарэння цяпер разбіраюцца спецыялісты з удзелам Баранавіцкай міжраённай інспекцыі па ахове працы. Іх вывады будуць аб’яўлены пазней. Тым не менш, такі факт выклікае не толькі пачуццё спачування да пацярпеўшай. Ён прымушае задумацца.

Толькі за ліпень, як расказвае начальнік упраўлення па працы, занятасці і сацыяльнай абароне райвыканкама Наталля Ігнацьеўна Клявец, работнікамі ўпраўлення праведзены маніторынг 12 арганізацый у горадзе і на сяле на прадмет захавання патрабаванняў тэхнікі бяспекі і аховы працы. У кожнай з іх складзены спіс выяўленых парушэнняў кіраўнікам ухіліць недахопы ў вызначаныя тэрміны.

Для навядзення элементарнага парадку не заўсёды патрэбны толькі грошы. У большай ступені неабходна воля кіраўнікоў калектываў і спецыялістаў, патрабавальнасць да падначаленых з тым, каб і радавыя выканаўцы зразумелі: захаванне тэхнікі бяспекі — гарантыя таго, што пасля працоўнай змены дамоў яны з’явяцца без траўм. А ігнараванне патрабаванняў па ахове працы — гэта рызыка, дзе шанцуе не кожнаму…

Мікалай ЛОЙКА.