Каб аўтобус паехаў

Іван Кавальчук — слесар са стажам. Сваю справу ведае дасканала: яму па сілах зрабіць самы складаны рамонт грузавога аўтамабіля і аўтобуса, ён разбярэ па шрубах каробку перадач і без асаблівых цяжкасцей збярэ яе назад. Па словах дырэктара аўтапрадпрыемства, калег па працы, Іван Кавальчук — слесар ад Бога.

Для таго, каб падтрымліваць бесперапынную работу транспарту, на ўчастку “Ганцавічы” філіяла “Аўтамабільны парк № 10 г. Лунінца” працуе рамонтная служба. Раней брыгада налічвала 12 чалавек, зараз рамонт аўтамабіляў ажыццяўляюць тры чалавекі.

— Разам са мною працуюць руплівыя людзі, — прызнаецца Іван Іосіфавіч. — Кожны з іх можа прэтэндаваць на званне лепшага ў прафесіі. Узяць, напрыклад, напарніка Мікалая Жыжу. Ён працуе не горш за мяне. Уважлівы, цярплівы, спраўляецца з самымі складанымі і дробнымі рамонтамі…

У час размовы сціплы субяседнік больш гаворыць пра іншых, чым пра сябе. Хаця раз-пораз вяртаецца да думкі, што галоўнае ў гэтым жыцці — праца, а ён да яе прывучаны з дзяцінства.

— Гэта сённяшнюю моладзь адвучылі працаваць. Лёгкі хлеб шукаюць, а яго няма. Забыліся зусім, што зямля — галоўная карміцелька. Паглядзіце, выміраюць вёскі, на працоўныя спецыяльнасці мала хто прэтэндуе. А пра адданасць рабочай прафесіі я ўжо і не гавару…

Сам жа Іван Кавальчук амаль трыццаць гадоў працуе на адным і тым жа месцы. Разам з прадпрыемствам перажываў часы ўзлётаў і падзенняў, гады безграшоўя і стабільнага фінансавага становішча. Івана Іосіфавіча неаднаразова запрашалі на працу прыватнікі, абяцалі добрыя заробкі, але ж ці варта ад дабра дабра шукаць?

З вялікай павагай і шчырасцю пра Івана Кавальчука гавораць яго калегі:

— Патэлефануйце яму ў дзве гадзіны ночы — прыйдзе на дапамогу, раскажыце аб праблеме — падкажа, як яе вырашыць. Безадмоўны чалавек у жыцці, сапраўдны майстар у слясарнай справе.

Думку калег падтрымлівае дырэктар аўтапрадпрыемства Уладзімір Кулашчык:

— Іван Кавальчук — прафесіянал высокага класа. Яго работа заўсёды вылучалася якасцю і хуткімі тэмпамі выканання. Ад прыроды ён надзелены тонкім пачуццём гумару, кемлівасцю. Такія людзі, як Іван Іосіфавіч, — галоўнае багацце прадпрыемства. За паўсядзённай працай такіх, як Іван Кавальчук, — нашы агульныя вынікі і паказчыкі работы, паспяховы заўтрашні дзень. Віншую ўсіх сваіх калег з прафесійным святам.

Галіна МІКАЛАЕВА.