Пракладваючы шляхі

Дарогі называюць артэрыямі жыцця. І нездарма. Без іх немагчыма нармальнае функцыянаванне эканамічнай, культурнай і іншых сфер сучаснай жыццядзейнасці.

Уся адказнасць за будаўніцтва, абслугоўванне і стварэнне бяспечных умоў руху на дарогах ляжыць на плячах работнікаў дарожных службаў.

Начальнік філіяла КУП “Брэстаблдарбуд” Ганцавіцкае ДРБУ-100 Алег ДАЙЛІД (НА ЗДЫМКУ) напярэдадні прафесійнага свята згадзіўся расказаць карэспандэнту “СП” аб тым, як ідуць справы ў мясцовай дарожнай арганізацыі.

Дарэчы, у снежні ДРБУ-100 споўніцца 60 гадоў. Да гэтага значнага юбілею калектыў прадпрыемства падышоў з пэўнымі вынікамі і поспехамі. Хаця, варта прызнаць, без цяжкасцей, як і ў любой іншай сферы, таксама не абыходзіцца. Але плён працы кожнага руплівага работніка не застаецца незаўважаным. Напрыклад, сёлета Алег Рыгоравіч стаў уладальнікам важнай узнагароды — нагруднага знака Міністэрства транспарту і камунікацый “Ганаровы дарожнік Беларусі” 2-й ступені.

ДРБУ-100 у лічбах

— Сёння на абслугоўванні ДРБУ-100 знаходзіцца 354, 9 кіламетра мясцовых аўтамабільных дарог, — расказаў Алег Дайлід. — З іх 170 кіламетраў з асфальтабетонным, 156,1 кіламетра з гравійным і 28,8 кіламетра з грунтавым пакрыццём. Мы абслугоўваем таксама 4 масты, 149 водапрапускных труб, 2 пляцоўкі адпачынку, 60 аўтобусных прыпынкаў, 37 аўтапавільёнаў, 2536 дарожных знакаў, 1415 сігнальных слупкоў. На баланс арганізацыі перададзена 170,5 кіламетра вуліц сельскіх населеных пунктаў.

Сярэдняя заработная плата работнікаў арганізацыі — 745,10 рубля. У параўнанні з мінулым годам заработная плата павялічылася на 19,3 працэнта.

Работа кіпіць

— Сёлета за 9 месяцаў, калі параўноўваць з 2016 годам, аб’ём выкананых работ павялічыўся на 119,6 працэнта і склаў 2,4 мільёна рублёў (летась было 2 мільёны рублёў), — працягнуў размову Алег Рыгоравіч. — Мы выканалі бягучы рамонт аўтадарогі Ліпск — Малькавічы — Задуб’е. Усяго ж сёлета адрамантавана 3,2 кіламетра аўтадарог. Гэта дарогі Кукава — Малыя Круговічы — Вялікія Круговічы (1,1 кіламетра), Востраў — Вялікія Круговічы (1,2 кіламетра). Апошнюю дарогу, дарэчы, перавялі на асфальтабетоннае пакрыццё. А ў сельскіх населеных пунктах адрамантавалі больш чым 2 кіламетры вуліц.

Алег Рыгоравіч адзначыў, што ў сувязі з няўстойлівай фінансавай сітуацыяй даводзіцца працаваць за межамі Брэсцкага рэгіёна. На сённяшні дзень спецыялісты ДРБУ-100 шчыруюць, напрыклад, на аб’ектах у Клецкім, Смалявіцкім раёнах Мінскай вобласці.

Нельга не сказаць і пра пастаяннае аднаўленне аўтапарка прадпрыемства. Нядаўна ён папоўніўся новай тэхнікай — пагрузчыкам “Амкадор-332С”.

Галоўнае — зладжаны калектыў

У арганізацыі працуе 76 работнікаў.

— Мы на самай справе ганарымся нашымі прафесіяналамі. Таму што ў нас дружны, працавіты калектыў, і цяжка некага асобна выдзеліць, — адзначыў Алег Дайлід.

Сёлета за добрасумленную, плённую працу і поспехі ў прафесійнай дзейнасці граматамі рознага ўзроўню адзначаны 9 чалавек. Гэта вядучы інжынер Юрый Мелехавец, дарожныя рабочыя Сяргей Мяцельскі і Аляксандр Дулік, вадзіцель пагрузчыка Пётр Пуцяты, вадзіцелі Васіль Дзенісеня і Іван Скубята, трактарысты Васіль Шуляк і Мікалай Мелехавец, эканаміст Кацярына Ермаковіч.

…Напрыканцы бяседы Алег Рыгоравіч выказаў добрыя словы ў адрас працаўнікоў і ветэранаў дарожнай галіны, а таксама аўтамабілістаў з нагоды прафесійнага свята, пажадаў усім моцнага здароўя, плённай працы, сямейнага дабрабыту.

Вікторыя ПРЫКОТА.

Фота аўтара.