З аператыўных зводак тыдня: арышт, пагроза нажом, вытворчая траўма

Замест хатняга арышту — рэальны

16 красавіка па матэрыялах Ганцавіцкага РАУС была ўзбуджана крымінальная справа згодна з арт. 415 КК Рэспублікі Беларусь (“Ухіленне ад адбывання пакарання ў выглядзе абмежавання волі”).

У маі бягучага года раней судзімы жыхар Ганцавіч 1985 года нараджэння, інвалід трэцяй групы, быў прыгавораны да абмежавання волі тэрмінам на 1,5 года за кіраванне аўтамабілем у стане алкагольнага ап’янення. Тады ў яго забралі пасведчанне вадзіцеля на 5 гадоў, прызначылі штраф у выглядзе 120 базавых велічынь, але ўрок не пайшоў ганцаўчаніну на карысць. Ужо праз некаторы час ён пачаў парушаць парадак і ўмовы адбыцця пакарання, з-за чаго яму былі вынесены афіцыйныя папярэджанні, якія мужчына праігнараваў.

Так, вечарам 27 верасня супрацоўнікі міліцыі высветлілі, што мужчына адсутнічае дома. Пасля чарговага парушэння ў адносінах да ганцаўчаніна і была ўзбуджана крымінальная справа (арт. 415 КК Рэспублікі Беларусь). Пакаранне — да трох гадоў рэальнага пазбаўлення волі.

Сваякі-злодзеі

У аўторак, 17 кастрычніка, у аператыўна-дзяжурную службу Ганцавіцкага РАУС паступіла паведамленне ад жыхара горада: жонка ўкрала ў яго пенсію і трое сутак адсутнічае дома.

А на наступны дзень, 18 кастрычніка, у РАУС звярнуўся жыхар вёскі Любашава. Мужчына расказаў, што яго родны брат разам са сваёй сужыцелькай у перыяд часу з 7 па 17 кастрычніка з кватэры забралі 60 рублёў, вопратку і прылады працы.

Падрабязнасці высвятляюцца.

Хацеў украсці ахвяраванні, ды не здолеў

18 кастрычніка ў міліцыю паступіла заява ад прадаўца прыватнага магазіна “Агеньчык”. Работніца паведаміла: у гандлёвым павільёне незнаёмы мужчына паводзіў сябе неадэкватна. Мала таго, падчас свайго “візіту” хуліган паспрабаваў украсці урну для ахвяраванняў на будаўніцтва храма.

Праверку праводзіць РАУС.

Ва ўсім вінаватыя медыкі?

У гэты ж дзень а другой гадзіне дня ў міліцыю звярнуўся жыхар горада. Мужчына паскардзіўся супрацоўнікам РАУС: на працягу двух дзён ён не можа прайсці медыцынскую камісію для працаўладкавання. На гэтай глебе ў яго адбыўся канфлікт з работнікамі бальніцы.

Падмануў і скарыстаўся

19 кастрычніка ўзбуджана крымінальная справа ў адносінах да невядомага, які 14 верасня знаходзіўся ў аддзяленні ААТ “ААБ Беларусбанк” па вуліцы Фрунзэ ў Ганцавічах. Там невядомы шляхам падману і злоўжывання даверам спецыяліста банка ўкраў 100 долараў.

Пад пагрозай нажа пенсіянерка аддала апошнія грошы суседу

Яшчэ адна крымінальная справа па паведамленні жыхаркі вёскі Малькавічы 1937 года нараджэння ўзбуджана ў гэты дзень. Пенсіянерка паведаміла, што 19 кастрычніка а трэцяй гадзіне дня да яе ў хату зайшоў сусед — мужчына 1964 года нараджэння. Ён, пагражаючы нажом, адабраў у пажылой жанчыны 20 рублёў.

Пашкодзіў людскую маёмасць

20 кастрычніка ўзбуджана крымінальная справа ў адносінах да жыхара вёскі Раздзялавічы 1995 года нараджэння. Малады чалавек 15 кастрычніка пашкодзіў тры секцыі бетоннай агароджы, а таксама драўляную агароджу і металічную браму падворкаў у вёсцы Люсіна. Матэрыяльная шкода гаспадарам склала больш за 500 рублёў.

За кіраванне транспартным сродкам у стане алкагольнага ап’янення затрыманы Павел Мікалаевіч Халецкі, жыхар горада Ганцавічы 1995 года нараджэння. Ён кіраваў аўтамабілем “Мерседэс-Спрынтар”, які належыць Эдуарду Генадзьевічу Смолічу.

Вытворчая траўма

16 кастрычніка ў аператыўна-дзяжурную службу Ганцавіцкага РАУС паступіла паведамленне ад урача-хірурга “Ганцавіцкай ЦРБ” аб тым, што па медыцынскую дапамогу звярнулася жыхарка вёскі Кукава 1972 года нараджэння. Жанчына працуе аператарам машыннага даення ў ААТ “Дубнякі”. Падчас работы на ферме № 2 яна выпадкова атрымала траўму правага локця.

Матэрыял праверкі накіраваны ў РАСК.

Зводкі чытала Ксенія ЛУЦКО.