Вызначыліся фіналісты кубка

22 кастрычніка на стадыёне СДЮШАР прайшлі паўфінальныя гульні адкрытага кубка раёна па футболе. Абедзве сустрэчы атрымаліся найцікавейшымі і не пакінулі раўнадушнымі шматлікіх гледачоў, якія сабраліся ў гэты дзень на трыбунах. У фінал заслугоўвалі выйсці ўсе чатыры каманды-паўфіналісты, аднак усё ж такі фіналістаў павінна было застацца двое. Па выніках абодвух матчаў імі сталі ганцавіцкія “ПМС” і “Будаўнік — ПМК-14”.

У першым паўфінале сустрэліся каманды “ПМС” і “Партызан”. Апошнія сустрэчы паміж гэтымі дружынамі былі напружанымі і завяршаліся ўнічыю. Так атрымалася і на гэты раз.

Лік у сустрэчы адкрылі футбалісты “Партызана”, вызначыўся Раман Грынюк. Аднак яшчэ да перапынку Юрый Мелехавец дакладным ударам зраўняў лік. У пачатку другога тайма футбалісты “ПМС” выйшлі наперад. Аляксандра Тарасеню ў штрафной плошчы чудзінскай каманды не па правілах атакавалі абаронцы “Партызана”, і галоўны суддзя матча Дзмітрый Матуліс справядліва прызначыў пенальці, які рэалізаваў Юрый Мелехавец — 2:1.

Пасля прапушчанага гола “Партызан” стаў дзейнічаць больш актыўна і ў сярэдзіне другога тайма зраўняў лік. Максім Праташчык ударам галавой не пакінуў шанцаў галкіперу “ПМС” Сяргею Рабцэвічу — 2:2. Менавіта з такім лікам і завяршыўся асноўны час гульні. А вось у серыі пенальці ўдача была на баку каманды “ПМС”. Аляксандр Рабцэвіч, Сяргей Савеня і Юрый Мелехавец выканалі свае ўдары бездакорна, а футбалісты “Партызана” так і не рэалізавалі ніводнага адзінаццаціметровага ўдару. Такім чынам, з лікам 3:0 у серыі пенальці перамогу і пуцёўку ў фінал атрымалі футбалісты “ПМС”.

Другі паўфінальны матч паміж ганцавіцкім “Будаўніком — ПМК-14” і малькавіцкім “АверсЛесам” таксама выдаўся цікавым. Першы тайм поўнасцю застаўся за “будаўнікамі”, якія да перапынку тройчы адправілі мяч у вароты саперніка. Два галы на свой рахунак запісаў Дзмітрый Прыхач, адзін раз вызначыўся Іван Вадап’ян.

А вось пасля перапынку малькавіцкая каманда здолела выраўняць гульню. Футбалісты “АверсЛеса” намаганнямі Аляксандра Дземчанкі і Дзмітрыя Савасцея скарацілі розніцу ў ліку да мінімуму — 2:3. Але аднавіць раўнавагу камандзе з Малькавіч так і не ўдалося. Наадварот, падчас адной з контратак Аляксандр Дайлід забіў чацвёрты гол у вароты “АверсЛеса” і ўстанавіў канчатковы лік сустрэчы — 4:2, на карысць каманды “Будаўнік — ПМК-14”.

Такім чынам, у фінале адкрытага кубка раёна па футболе згуляюць каманды “ПМС” і “Будаўнік — ПМК-14”. Сустрэча адбудзецца ў Ганцавічах на стадыёне СДЮШАР у нядзелю, 29 кастрычніка. Пачатак у 14.00.

Уладзімір ЗАНЬКА.