Прычына пажару — падпал!

31 жніўня супрацоўнікі Ганцавіцкага РАНС сутыкнуліся з праблемай загарання сухой расліннасці за вёскай Ганцавічы, уздоўж трасы Клецк — Сіняўка — Ганцавічы — Лунінец. З-за сухога і цёплага надвор’я і ветру агонь хутка распаўсюдзіўся на блізляжачыя тарфянікі, якія ўжо прагарэлі на глыбіню амаль 1 метр. Каб спыніць далейшае распаўсюджванне агню для тушэння былі прыцягнуты сілы не толькі РАНС, але і прадпрыемстваў раёна. Калі б не своечасовае прынятыя меры, райцэнтр надоўга быў бы ахутаны дымам ад гарэння тарфянікаў.

Па словах начальніка раённага аддзела па надзвычайных сітуацыях Андрэя Лабко, прычынай узгарання стала наўмыснае падпальванне травы ў 6 месцах, так званых ачагах узгарання. Каму і нашто гэта спатрэбілася — казаць складана, ні сведак здарэння, ні відавочцаў пакуль знайсці не ўдалося. Андрэй Васільевіч расказаў, што гэта не адзіночны выпадак падпальвання травы грамадзянамі. Так, у вёсцы Малькавічы надоечы таксама загарэлася сухая расліннасць вакол нежылога дома, і магчымай прычынай пажару супрацоўнікі РАНС называюць менавіта спецыяльны падпал.

Андрэй Лабко папярэдзіў, што за незаконнае выпальванне сухой расліннасці, траў на корні, а таксама ржышча і пажніўных рэшткаў на палях або непрыняцце мер па ліквідацыі выпальванняў на зямельных участках цягнуць накладанне штрафу ў памеры ад 10 да 40 базавых велічынь. Дадзеныя дзеянні з’яўляюцца не толькі парушэнне перад законам, але і перад прыродай і людзьмі, якім прыходзіцца дыхаць дымам ад пажару.

Раённы аддзел Ганцавіцкага РАНС просіць усіх жыхароў горада і раёна быць пільнымі і сумленнымі, не заставацца ў баку ад дадзенай праблемы і пры выяўленні ўзгарання або “падпальшчыкаў” адразу паведамляць аб гэтым у адпаведныя органы.

Варта згадаць і аб згарэўшай скірдзе саломы на ферме ў вёсцы Палонь. Там таксама відавочны так званы чалавечы фактар. Зараз вядзецца разбіральніцтва праваахоўнымі органамі, а спецыялістам СВК раёна ў чарговы раз даручана прывесці месцы складзіравання саломы і грубых кармоў у належны стан у адпаведнасці з правіламі пажарнай бяспекі.

Ксенія ЛУЦКО.