Без нечаканасцей пачаўся футбольны турнір памяці Васіля Праскурава

У мінулыя выхадныя на Ганцаўшчыне стартаваў футбольны турнір на прызы газеты “Савецкае Палессе”, прысвечаны

У першым чвэрцьфінале, які прайшоў у суботу, сустракаліся каманды “Хатынічы” і “АверсЛес” (Малькавічы). Гульня выдалася эмацыянальнай і бескампраміснай. У многім на гэта паўплывалі судзейскія рашэнні, якія ў некаторых выпадках выклікалі пэўныя пытанні. У рэшце рэшт, больш пашанцавала футбалістам з Хатыніч. Менавіта яны і атрымалі перамогу з лікам 5:3.

23 жніўня адбыліся астатнія чвэрцьфінальныя матчы. У Люсіне гаспадары поля прымалі ганцавіцкі “Сатурн”. У ходзе гульні здавалася, што гаспадары поля без праблем перамогуць каманду з райцэнтра: люсінскія футбалісты вялі ў ліку 5:0. Аднак ігракі “Сатурна” прадэманстравалі сапраўдны характар, забілі тры галы ў адказ, мелі некалькі выдатных шанцаў для таго, каб забіць яшчэ, аднак імі не скарысталіся. Гаспадары ж поля напрыканцы сустрэчы забілі шосты гол. У выніку перамога каманды “Люсіна” з лікам 6:3.

У райцэнтры паміж сабой сустракаліся ганцавіцкі “Атлант” і рабяты з “ДЮСШ СВК “Агарэвічы”. У цэлым паядынак праходзіў з перавагай футбалістаў “Атланта”. Яны мелі шэраг галявых момантаў для ўзяцця варот, аднак доўгі час не маглі “прабіць” галкіпера каманды “ДЮСШ СВК “Агарэвічы” Аляксея Кандратовіча. У сваю чаргу, у другім тайме бліскучы шанц для таго, каб адкрыць лік, мелі і юнакі са спартыўнай школы, аднак мяч пасля ўдару Максіма Дамашэвіча трапіў у перакладзіну.

У рэшце рэшт, футбалістам “Атланта” ўсё ж такі ўдалося зламіць супраціўленне больш юных сапернікаў і двойчы адправіць мяч у сетку варот каманды “ДЮСШ СВК “Агарэвічы”. Канчатковы лік — 2:0, на карысць “Атланта”.

У Будчы, якая ў гэты дзень адзначала сваё 500-годдзе, чудзінскі “Партызан” прымаў малькавіцкі “Бальшавік”. Сустрэча праходзіла з перавагай намінальных гаспадароў і завяршылася ўпэўненай перамогай футбалістаў “Партызана” з лікам 4:1.

Падчас матча ў Будчы ўзнік адзін эпізод, на які хацелася б звярнуць увагу. У адным з момантаў гульні траўму атрымаў футбаліст “Бальшавіка”, які адразу ж выказаў абурэнне тым, што на матчы адсутнічае медработнік. Аднак заўвагу прадстаўніка малькавіцкай каманды можна лічыць беспадстаўнай, таму што медыцынская дапамога траўміраванаму іграку была аказана своечасова.

Такім чынам, сталі вядомы паўфінальныя пары футбольнага турніру на прызы газеты “Савецкае Палессе”, прысвечанага памяці В. Ф. Праскурава. “Хатынічы” прымуць ганцавіцкі “Атлант”, а каманда “Люсіна” на сваім полі згуляе супраць “Партызана”. Гульні пройдуць 29 або 30 жніўня. Дакладны дзень і час правядзення паўфінальных сустрэч будуць залежыць ад матча ФК “Ганцавічы” ў чэмпіянаце Брэсцкай вобласці.

Уладзімір САКАЛОЎ.