Ёсць рэкордны ўраджай!

Земляробы Ганцаўшчыны паспяхова закончылі масавую ўборку зернявых і зернебабовых культур. Атрыманы рэкордны ўраджай за ўсю гісторыю нашага раёна. Валавы намалот у бункернай вазе склаў звыш 39 тысяч тон — амаль на 4 тысячы тон больш мінулагодняга. У сярэднім з гектара атрымана 36 цэнтнераў зерня.

Хлебная ніва аддзячыла за старанне, клопат і гаспадарскі падыход да нашага галоўнага багацця — зямлі. Увесь комплекс работ быў праведзены на высокім агратэхнічным узроўні. Нашы аграрыі даказалі, што вырошчваць багаты ўраджай можна нават у складаных кліматычных ўмовах.

У мінулы панядзелак камбайнеры СВК “Бярозавец” абмалочвалі авёс на апошніх гектарах. Гэтая яравая культура парадавала важкім коласам. Сярэдняя ўраджайнасць з гектара склала 37,4 цэнтнера. Амаль столькі ж атрымалі азімага жыта і пшаніцы.

— У гаспадарцы ўсебакова і адказна падышлі да правядзення жніва, — гаворыць намеснік старшыні райсельгасхарчу Міхаіл Канановіч. — Інжынерная служба прадугледзела ўсё да дробязей. Сем экіпажаў збожжаўборачных камбайнаў, якія былі задзейнічаны на жніве, у тэрмін і з высокай якасцю ўбралі ўраджай з 1000-гектарнай плошчы.

У галоўнага агранома СВК “Бярозавец” Марыны Хваль сёлетняе жніво —  першае ў жыцці. І, трэба адзначыць, малады спецыяліст вытрымала гэты важны і адказны экзамен на выдатна. Яна закончыла Беларускую сельскагаспадарчую акадэмію, два гады працавала аграномам-насенняводам у ААТ “Белавежскі” Камянецкага раёна.

Зрэшты, жніво з’явілася адказным экзаменам для ўсіх земляробаў. Гэта адзначае вопытны камбайнер СВК “Бярозавец” Уладзімір Татарыновіч. 35 гадоў аддаў ён хлебнай ніве, другі сезон убіраў ураджай разам з сынам Мікалаем. Добра папрацавалі таксама іншыя экіпажы гаспадаркі. Сярод іх Васіль Жалезны і Аляксей Петух, Сяргей Новік і Ілья Наумік, Іван Велька і Іван Карпеня.

Работа на палях не спыняецца. У гэтыя дні механізатары раёна вядуць падрыхтоўку глебы пад сяўбу азімых збожжавых культур і рапсу.

Міхась АРЭШКА.

начальнік участка “Малькавічы” СВК “Бярозавец” Сяргей Дзічка гутарыць з сямейным экіпажам Уладзімірам Татарыновічам і яго сынам Мікалаем.

Фота Міхася АРЭШКІ.