ГАЛОЎНАЕ Ў РАБОЦЕ — АДКАЗНАСЦЬ

Уборачная кампанія падыходзіць да завяршэння — застаецца ўбраць збожжа менш чым з 20 працэнтаў плошчаў.

Часта ў гаспадарках нашага раёна паказчыкі адрозніваюцца адзін ад аднаго, і ў першую чаргу гэта залежыць ад ураджайнасці і ад спраўнасці тэхнікі. Так, СВК “Адраджэнне”, хаця і не займае лідзіруючыя пазіцыі па тэмпах уборкі, але ўпэўнена рухаецца наперад. На раніцу аўторка,11 жніўня ў гаспадарцы ўбралі 872 гектары і намалацілі 3548 тон збожжа. Старшыня СВК Валерый Макарскі адзначыў, што калі далей усё будзе ісці такімі ж тэмпамі, то праз тыдзень ці паўтара ўборачная кампанія ў “Адраджэнні” завершыцца. Дарэчы, сёлета ў гаспадарцы даволі высокая ўраджайнасць, што сведчыць пра своечасовае і якаснае выкананне ўсіх агратэхнічных мерапрыемстваў па вырошчванні зернявых і зернебабовых культур.

Уборку ў гаспадарцы пачалі своечасова. Усе камбайны выйшлі ў поле, але, як і ў любым іншым СВК, у “Адраджэнні” ёсць свае лідары.

На жніве перадавіком сярод камбайнераў быў Віктар Кісялевіч. Але, на жаль, некалькі дзён таму назад яго падвяла тэхніка: зламаўся камбайн, на якім ён працаваў.

А таму зараз лідзіруючую пазіцыю займаюць камбайнер Дзмітрый Гуцановіч і яго памочнік Андрэй Рабцэвіч. На раніцу ўчарашняга дня яны намалацілі 647 тон зерня.

Дзмітрый малады, яму ўсяго 26 гадоў, але ён ужо доўга працуе ў сельскай гаспадарцы. Скончыўшы сярэднюю спецыяльную навучальную ўстанову, хлопец адразу прыйшоў працаваць у СВК. Яго жонка таксама працуе ў “Адраджэнні”, яна ветэрынарны ўрач. Дзмітрыя паважаюць у працоўным калектыве, ён адказна падыходзіць да ўскладзеных на яго абавязкаў і ўважліва адносіцца да тэхнікі. А таму ў мінулым годзе яму даверылі не толькі камбайн, але і новы кормаўборачны комплекс.

Яго напарнік Андрэй Рабцэвіч ужо даўно працуе ў СВК. Але, у адрозненне ад ранейшых часоў, калі ён цэлы год працаваў у гаспадарцы, цяпер прыходзіць толькі на час уборачнай. У астатні час Андрэй працуе ў лясгасе.

Яшчэ адзін перадавік СВК “Адраджэнне” — вадзіцель Уладзімір Рабцэвіч. На раніцу аўторка ён перавёз на старэнькім “КамАЗе” звыш 1000 тон збожжа. Уладзімір працуе ў СВК ужо шмат гадоў. Ён добрасумленна ставіцца да сваіх абавязкаў, заўсёды загадзя рыхтуе тэхніку да работы. А таму, нягледзячы на “шаноўны ўзрост” машыны, на якой перавозіць збожжа на працягу ўсёй уборачнай, з’яўляецца перадавіком.

— Наогул, усе нашы працаўнікі адказна падыходзяць да справы, — адзначыў Валерый Макарскі. — Для нас галоўнае — сабраць добры ўраджай. Я рады, што ў гаспадарцы дружны калектыў, які працуе зладжана. Але мне хацелася б адзначыць яшчэ аднаго чалавека, які вельмі адказна ставіцца да сваіх абавязкаў. Работнік КЗС Пётр Кісялевіч вось ужо 20 гадоў з’яўляецца адным з лепшых нашых працаўнікоў, нягледзячы на тое, што шчыруе тут не круглы год. Акрамя нашай гаспадаркі Пётр Міхайлавіч працуе ў ЖКГ. Упэўнены, што там ён таксама з’яўляецца адказным работнікам.

Так, СВК “Адраджэнне” не з’яўляецца лідарам уборачнай кампаніі. Але стабільнасць, зладжанасць калектыву і адказны падыход да справы дапамагаюць гаспадарцы ўпэўнена ўбіраць ураджай.

Аляксандра ГУРМАН.

Фота аўтара.