Гараць расліннасць і тарфянікі…

З надыходам спякотнага надвор’я рэзка павялічылася колькасць пажараў у лясных масівах і на тарфяніках. Як паведамілі ў райаддзеле па надзвычайных сітуацыях па стане на 10 жніўня падраздзяленні РАНС здзейснілі 122 выезды на тушэнне сухой расліннасці і тарфянікаў.

Так, сёлета гарэнне буйных тарфянікаў адбывалася на тэрыторыі Люсінскага сельсавета, дзе плошча гарэння склала каля 5 гектараў. Яшчэ больш пацярпелі землі Чудзінскага сельсавета, дзе тарфянікі гарэлі на плошчы каля 10 гектараў. І толькі дзякуючы сумесным намаганням і дзеянням выратавальнікаў і супрацоўнікаў мясцовых сельгаскааператываў тарфянікі ўдалося патушыць у самыя кароткія тэрміны.

На сённяшні дзень праблемы існуюць на тэрыторыі СВК “Адраджэнне”, дзе ўдалося ліквідаваць чатыры пажары, аднак два ачагі гарэння пакуль што патушыць не ўдалося. Вельмі праблемнымі з’яўляюцца і землі, якія належаць СВК “Хатынічы”. Тут гарэнне тарфянікаў было выяўлена яшчэ 9 чэрвеня. Тады плошча пажару складала 250 квадратных метраў. Па стане на 8 жніўня яна павялічылася да 5 гектараў. У многім гэта звязана з тым, што працаўнікі сельгаскааператыва і тэхніка гаспадаркі не прыцягваліся для тушэння пажару…

Адбылося узгаранне тарфяннікаў і з боку Лунінецкага раёна, недалёка ад вёсак Дзяніскавічы і Макава. Да тушэння пажару прыцягнуты верталёты, экіпажы якіх 12 жніўня сумесна з наземнымі службамі займаюцца ліквідацыі пажару. Падрабязней аб гэтым у суботнім нуміары «СП» за 15 жніўня…  

Спякота не спадае. Таму з мэтай прадухілення пажараў, бяспекі знаходжання грамадзян у лясах, уведзена забарона на наведванне лясоў ва ўсіх абласцях рэспублікі. Згодна з Лясным кодэксам, забарону на наведванне лясоў, у тым ліку ўезд механічных транспартных сродкаў у лясы і на тарфянікі, у сувязі з высокай пажарнай небяспекай, упаўнаважаны ўводзіць органы мясцовай выканаўчай улады (райвыканкамы). У перыяд дзеяння забароны дазваляецца праязджаць на аўтатранспарце толькі па дарогах, якія вядуць да населеных пунктаў, а таксама да ўладкаваных месцаў адпачынку. Распальванне вогнішчаў у лясах і на тарфяніках на гэты перыяд забаронена. У выпадку выяўлення парушэнняў правілаў пажарнай бяспекі ў лясах вінаватыя прыцягваюцца да адміністрацыйнай адказнасці ў адпаведнасці з дзеючым заканадаўствам.