Першае паражэнне

Прайшлі матчы сёмага тура адкрытага чэмпіянату раёна па футболе. Найбольш цікавай выдалася гульня ў Люсіне, дзе мясцовая каманда прымала мінулагодніх чэмпіёнаў — футбалістаў “Будаўніка — ПМК-14”.

На першых хвілінах сустрэчы цяжка было аддаць перавагу якой-небудзь з каманд. Люсінскія футбалісты дзейнічалі больш актыўна, у той час, як тэхнічным ігракам “Будаўніка — ПМК-14” цяжка было знайсці сваю гульню на футбольным полі не самай лепшай якасці. Лік у сустрэчы быў адкрыты ў сярэдзіне першага тайма: пасля розыгрышу вуглавога вызначыўся паўабаронца люсінскай каманды Арцём Санюк. Да перапынку госці мелі выдатны шанц для таго, каб адыграцца, але не скарысталі яго.

На самым пачатку другой паловы паўабаронца “Будаўніка — ПМК-14” Аляксандр Харлаагійн зраўняў лік. Пасля гэтага “будаўнікі” завалодалі ініцыятывай і стварылі яшчэ некалькі небяспечных момантаў ля варот Аляксея Науміка, аднак вызначыцца ім так і не ўдалося. А вось гаспадары ў сярэдзіне другой паловы, скарыстаўшы непаразуменне галкіпера і абаронцаў “Будаўніка — ПМК-14”, здолелі забіць другі гол і выйсці наперад. Праз некалькі хвілін каманда “Люсіна” забіла трэці гол, які і стаў вырашальным. Футбалісты “Будаўніка — ПМК-14” імкнуліся выправіць сітуацыю і нават здолелі адыграць адзін гол, але для таго, каб адыграцца, часу ў гасцей не хапіла.

Такім чынам, сустрэча завяршылася перамогай каманды “Люсіна” з лікам 3:2.

У Азярэччы мясцовая “Арбіта” сустракалася з чудзінскім “Партызанам” і саступіла з лікам 1:3.

Яшчэ дзве сустрэчы прайшлі ў Ганцавічах на гарадскім стадыёне і завяршыліся з аднолькавым лікам — 6:1: юнакі з “ДЮСШ СВК “Агарэвічы” не пакінулі шанцаў малькавіцкаму “АверсЛесу”, “Атлант” упэўнена “разабраўся” з “Сатурнам”.

Уладзімір САКАЛОЎ.