“Хатынічы” перамаглі “Атлант”

Мінімальнай перамогай хатыніцкіх футбалістаў з лікам 1:0 над камандай “Атлант” завяршыўся цэнтральны матч шостага тура адкрытага чэмпіянату раёна па футболе.

Паядынак прыцягнуў вялікую ўвагу прыхільнікаў футбола, якія сабраліся на стадыёне ў Хатынічах паназіраць за супрацьстаяннем лідараў турнірнай табліцы.

У пачатку сустрэчы каманды дзейнічалі асцярожна і больш увагі надзялялі абароне сваіх варот. У першыя паўгадзіны сапернікі стварылі па адным небяспечным моманце ля варот адзін аднаго, аднак сваімі шанцамі не скарысталіся ні “Хатынічы”, ні “Атлант”. А напрыканцы першай паловы здарыўся эпізод, які і стаў вырашальным у гэтай гульні. Галоўны арбітр матча Аляксандр Дайлід прызначыў пенальці ў вароты “Атланта” за гульню рукой і Ігар Катовіч ударам з адзінаццацімятровай адзнакі адкрыў лік у сустрэчы.

Пасля перапынку футбалісты “Атланта” дзейнічалі больш актыўна, мелі некалькі магчымасцей для таго, каб зраўняць лік, але вызначыцца ў стартавыя хвіліны другой паловы ім так і не ўдалося. Больш таго, у сярэдзіне другога тайма госці засталіся ў меншасці пасля выдалення Віктара Лойкі. Напрыканцы сустрэчы “Хатынічы” аддалі ініцыятыву гасцям, пачалі гуляць на контратаках і хутчэй маглі забіць другі гол, чым футбалісты “Атланта” адыграцца.

Такім чынам, фінальны свісток арбітра зафіксаваў мінімальную перамогу каманды “Хатынічы” з лікам 1:0, якая пасля гэтай гульні ўзначаліла турнірную табліцу чэмпіянату.

Футбалісты “Люсіна” на гарадскім стадыёне даволі ўпэўнена перамаглі юнакоў з “ДЮСШ СВК “Агарэвічы” з лікам 4:0. У першым тайме люсінскія футбалісты адкрылі лік. Намінальныя гаспадары спрабавалі адыграцца, аднак не зусім зладжаныя дзеянні юнакоў з “ДЮСШ СВК “Агарэвічы”, а таксама даволі спрэчнае судзейства не дазволілі гэтага зрабіць.

У другім тайме ў рабят са спартыўнай школы таксама было некалькі шанцаў для таго, каб забіць гол, але яны імі не скарысталіся. У той час, як госці правялі яшчэ некалькі выніковых атак і давялі лік да разгромнага.

У Азярэччы паміж сабой сустракаліся мясцовая “Арбіта” і малькавіцкі “АверсЛес”. Гаспадары пачалі гульню больш упэўнена і пасля першага тайма павялі ў ліку — 2:0. Аднак у другой палове матча футбалісты з Малькавіч здолелі адыграцца. У выніку, нічыя — 2:2, якая дазволіла абедзвюм камандам атрымаць свае першыя ачкі ў чэмпіянаце.

Гульні чарговага тура адбудуцца ў нядзелю, 26 ліпеня. У Люсіне пройдзе цэнтральны матч тура, у якім паміж сабой згуляюць каманды “Люсіна” і “Будаўнік — ПМК-14”. У райцэнтры пройдуць дзве сустрэчы: “ДЮСШ СВК “Агарэвічы” — “АверсЛес” і “Атлант” — “Сатурн”. Яшчэ адна гульня адбудзецца ў Азярэччы, дзе сустрэнуцца мясцовая “Арбіта” і чудзінскі “Партызан”.

Уладзімір САКАЛОЎ.