Летапісец і дарадца

У Ганцавіцкім краязнаўчым музеі працуе выстава, прысвечаная 70-гадоваму юбілею раённай газеты “Савецкае Палессе”.

Першы нумар Ганцавіцкай раённай газеты пад назвай “Сялянская праўда” выйшаў 1 жніўня 1945 года. Паступова ўваходзіла ў звыклы рытм пасляваеннае жыццё. Аднаўлялася сельская гаспадарка. Праводзілася меліярацыя забалочаных земляў. Пачыналі дзейнічаць новыя ўстановы, арганізацыі і прадпрыемствы. Будаваліся шматкватэрныя жылыя дамы.

Яркім летапісцам усіх значных і важных падзей на Ганцаўшчыне, добрым дарадцам і надзейным памочнікам была і застаецца раённая газета.

— На чатырох спецыяльных планшэтах размешчана звыш 100 фотаздымкаў, якія адлюстроўваюць працоўныя будні супрацоўнікаў рэдакцыі, іх сустрэчы са знакамітымі і вядомымі людзьмі, — расказвае дырэктар раённага краязнаўчага музея Наталля Кулеш. — У экспазіцыі мы імкнуліся найбольш поўна паказаць гісторыю газеты, пачынаючы з першых нумароў і заканчваючы сённяшнім днём.

Шматлікія фотаілюстрацыі ўдала дапасоўваюцца да ўнікальных дакументаў. Сярод іх пачэснае месца займаюць ганаровыя граматы і дыпломы. Імі ў свой час была ўзнагароджана газета і рэдактары Васіль Праскураў, Іван Амяляшчык і Канстанцін Мохар.

Прыцягнуць увагу наведвальнікаў і юбілейныя выпускі, прысвечаныя 50-, 55-, 60- і 65-годдзю з дня выхаду ў свет раённай газеты.

Работнікі музея выказваюць асаблівую ўдзячнасць мінчаніну, былому адказнаму сакратару “Сялянскай праўды” Сяргею Дзерышаву. Ён аператыўна адгукнуўся на просьбу і даслаў тры фотаздымкі тых далёкіх часін. На двух з іх разам з супрацоўнікамі рэдакцыі Іван Лісецкі, які ўзначальваў газету на пачатку 50-х гадоў.

Да стварэння змястоўнай і цікавай экспазіцыі праявілі ўдумлівы і творчы падыход работнікі музея: мастак Людміла Лямбовіч, галоўны захавальнік Віталь Герасіменя і навуковы супрацоўнік Наталля Боўт. Яны сардэчна запрашаюць жыхароў горада і раёна наведаць выставу, прысвечаную 70-гадоваму юбілею раённай газеты “Савецкае Палессе”. Яна будзе працаваць да сярэдзіны жніўня.

Міхась АРЭШКА.

НА ЗДЫМКАХ: дырэктар раённага краязнаўчага музея Наталля Кулеш знаёміць з выставай госця з Масквы, ураджэнца вёскі Малыя Круговічы Віктара Віктаровіча; частка экспазіцыі.

Фота Алы ПЯТЛІЦКАЙ.