Аднабаковы рух

“В связи с тем, что по ул. Коммунистической постоянно идёт большой транспортный поток, а проезжая часть узкая, к тому же не оборудована “полицейскими” и тротуарами, а по ней постоянно передвигаются дети и взрослые, которые подвергаются опасности. Большая просьба принять меры по устранению данных неудобств. Сделать движение по улице односторонним, оборудовать дополнительную парковку около магазина “Родны кут” по ул. Коммунистической, так как возле “Белагропромбанка” постоянно большое скопление машин. Закрыть движение большегрузных машин, из-за шума невозможно находиться в домах: всё содрогается, звенит. Возможно эта дорога не предназначена для такого огромного транспортного потока”, — гаворыцца ў звароце, падпісаным 56 жыхарамі вуліцы.

Для вырашэння пытання была створана камісія з адказных спецыялістаў аддзела жыллёва-камунальнай гаспадаркі, архітэктуры і будаўніцтва райвыканкама, аддзялення ДАІ, жыллёва-камунальнай гаспадаркі на чале з намеснікам кіраўніка раёна Уладзімірам Рапейкам. Спачатку адказныя асобы на месцы дэталёва вывучылі ўзнятыя ў звароце пытанні і затым 18 чэрвеня 2015 года правялі агульны сход жыхароў вуліцы, на якім і вызначаны канкрэтныя меры, неабходныя для выпраўлення сітуацыі.

Найперш, улічваючы, што на вуліцы ўстаноўлены дарожныя знакі, якія абмяжоўваюць хуткасны рэжым, у абсталяванні праезнай часткі штучнымі няроўнасцямі няма патрэбы. У сваю чаргу супрацоўнікі ДАІ павінны арганізаваць сістэматычны кантроль за захоўваннем хуткаснага рэжыму.

Калі гаварыць аб абсталяванні дарогі тратуарамі, то гэта немагчыма ў сувязі з тэхнічнымі складанасцямі (вуліца і так даволі вузкая) і адпаведна адсутнасцю значных фінансавых сродкаў, якія для гэтага патрабуюцца. Што датычыцца паркоўкі каля магазіна райспажыўтаварыства, то трэба правесці яе рамонт з устаноўкай адпаведных сродкаў арганізацыі дарожнага руху. Таксама неабходна ўстанавіць дарожныя знакі, якія забараняюць прыпынак аўтатранспарту на супрацьлеглым ад будынка аддзялення банка баку. І самае галоўнае, арганізацыя аднабаковага дарожнага руху і абмежаванне праезду вялікагрузных транспартных сродкаў. Усе пытанні былі вынесены на разгляд камісіі па забеспячэнні бяспекі дарожнага руху пры райвыканкаме, якая ў сваю чаргу падрабязна вывучыўшы сітуацыю вынесла пытанні арганізацыі дарожнага руху па вуліцы Камуністычнай на разгляд раённага выканаўчага камітэта.

У адпаведнасці з Законам Рэспублікі Беларусь ад 5 студзеня 2008 года № 313-З “Аб дарожным руху” усе згаданыя пытанні ўваходзяць у кампетэнцыю менавіта мясцовых распарадчых і выканаўчых органаў улады.

І ўжо 8 ліпеня 2015 года прынята рашэнне райвыканкама, ў якім прадпісваецца выканаць усе мерапрыемствы, вызначаныя камісіяй па забяспячэнні бяспекі дарожнага руху пры райвыканкаме, да 1 жніўня. Прычым для арганізацыі аднабаковага руху па вуліцах Камуністычнай і Арлоўскага (для зручнасці руху аўтатранспарту) будуць устаноўлены часовыя дарожныя знакі для таго, каб на практыцы ўбачыць, якім чынам змянілася сітуацыя, тым больш, што тут трэба ўлічваць і інтарэсы жыхароў суседніх вуліц. І ўжо да 1 верасня 2015 года камісія па бяспецы руху ўнясе прапановы для канчатковага рашэння па арганізацыі дарожнага руху ў згаданым раёне горада.

Аляксей ГРУШЭВІЧ.